«Suriyanın şimalında yaranmış gərginlik Avropa İttifaqının (Aİ) mövqeyinin dayanıqsız olduğunu ortaya qoydu». Bu bəyanatla Avroparlamentdəki «Avropa uğrunda liberalların və demokratların alyansı» fraksiyasının başçısı Gi Verxofstadt çıxış edib.

Yenixeber.org: «ABŞ-ın Suriyadan getməsi və Türkiyənin hücumu yenə də Avropanın geosiyasi zəifliyini nümayiş etdirdi. İndi bizim təhlükəsizliyimiz üzrə qərarı Türkiyə və Rusiya qəbul edir» – onun «Tvitter» səhifəsindəki xəbərdə deyilir.

Aİ parlamentinin üzvü Avropa İttifaqını öz taleyini öz əlinə almağa və «müdafiə sferasında gerçək ittifaq» yaratmağa çağırıb. Siyasətçi bu məsələdə Rusiyanın nerativ rolunun nədən ibarət olduğuna aydınlıq gətirməyib.

«Tvitter»dəki yazısını o, Suriyadakı kürd terrorçularının fotosu ilə müşayiət etdirib.

Xəbər verildiyi kimi, Qərb Türkiyənin Suriyada başladığı «Sülh çeşməsi» əməliyyatına mənfi reaksiya verib. Ankara isə ərazidəki kürd silahlı birləşmələrini terrorçu elan edib.

Buradan belə çıxır ki, Avropa dövlətləri sözdə terroru «pisləsələr» də əməldə terrorçuların yanında yer alırlar.(azpolitika)