“Türkiyə Su-57 döyüş təyyarələri üçün əlverişli bazardır. Əgər Türkiyə bu təyyarələrdən almaq istəsə, bu sahədə əməkdaşlıq etməyə hazırıq”.

Yenixeber.org: Bunu Rusiyanın ”Rosteh” dövlət müdafiə sənayesi şirkətinin sədri Sergey Çemezov deyib.

Sədr bildirib ki, Türkiyənin NATO ölkəsi olmasına rəğmən, S-400 zenit raket kompleksini alması və ABŞ-ın buna görə tətbiq etdiyi təzyiq və təhdid sisteminə qarşı qətiyyətli mövqe sərgiləməsini Rusiya rəğbətlə qarşılayır. Türkiyə prezidenti Rəcəb Tayyib Ərdoğanı S-400 və S-500 müdafiə sistemlərinin ortaq istehsalı ilə bağlı verdiyi açıqlamaya da aydınlıq gətirən Çemezov qeyd edib ki, Rusiya üçün Türkiyə ilə hava müdafiə sistemi sahəsində əməkdaşlıq etmək əhəmiyyətlidir.

Sergey Çemezov Rusiyanın 5-ci nəsil Su-57 təyyarələrinin ixracına icazə verən sənədlərin imzalandığını diqqətə çatdırıb: “Öncəliklə, Rusiya Müdafiə Nazirliyinin Su-57 ehtiyacını qarşılamağı hədəfləyirik. Su-57 fövqəladə potensiala sahibdir, buna görə də onun gələcəkdə ixracatına dair tələbatları dəyərləndiririk. Əgər Türkiyə bu təyyarələrdən istəsə, məmnuniyyətlə əməkdaşlıq edə bilərik”.

Qeyd edək ki, Su-57 döyüş təyyarələri ABŞ və Türkiyə daxil olmaqla, 8 ölkənin ortaq istehsal etdiyi F-35 qırıcılarına alternativ kimi göstərilir. ABŞ Türkiyəni bu qırıcıları tədarük etməməklə təhdid edir.