Rusiya prezidenti Vladimir Putinin mətbuat katibi Dmitri Peskov Serbiyanın mətbuatına "Vaqner" muzdlularının rəhbəri Yevgeni Priqojinlə bağlı vəziyyəti şərh edib. 

Yenixeber.org:Peskov qruplaşmanın Baxmutdan getməyəcəyini açıqlayıb.  

O, həmçinin şəhərin Rusiya qüvvələri tərəfindən nəzarət altına alınacağını da əlavə edib. 

"Heç kimin adını çəkməyəcəyəm, amma deyim ki, onlar nə deyirlər desinlər, hansı bəyanatlar verirlərsə versinlər, söhbət Rusiya Federasiyasının silahlı qüvvələrindən gedir. Bunların hamısı Rusiya qüvvələridir. Bunlar hamısı eyni qüvvələrdir ki, eyni məqsədi həyata keçirirlər. Biz şübhə etmirik ki, şəhər nəzarət altına alınacaq”, - Peskov bildirib. 

"Orada çox güclü istehkam ərazisi və Ukrayna silahlı qüvvələrinin böyük qruplaşması var. Həmçinin xarici silahlar var. Ona görə də orada emosiyalar qaynayır", - Peskov söyləyib. 

Daha əvvəl Rusiyanın müxalif-liberal "Meduza" nəşri yazmışdı ki, Kreml Priqojinin bəyanatlarını mənfi qəbul edib və onun qırmızı xətləri keçdiyini hesab edir. 

Qərbin nüfuzlu "Politico" nəşri isə Priqojinin sursat çatışmazlığı barədə kampaniyasının saxta olduğunu yazıb. 

Nəşr 2 ABŞ rəsmisinə istinadən əslində qruplaşmanın hələ də Baxmutun əhəmiyyətli hissəsinə nəzarət etdiyini qeyd edib: "Priqojinin dediyindən daha çox döyüş sursatı var". 

Rəsmilər əlavə ediblər ki, Priqojinin çıxışlarını və verdiyi vədləri daha ətraflı şərh etməyəcəklər, çünki Putinin aşpazı özü üçün əlverişli siyasi mövqe tutmaq üçün belə bir kampaniya aparır.