AZ
RU
Müəmmər Gülər də əks-hücuma keçdi
Türkiyədə 17 dekabrda həyata keçirilən korrupsiya və rüşvətxorluğa qarşı əməliyyatda oğlu həbs olunan sabiq daxili işlər naziri Müəmmər Gülər Mardində, seçicilərinin qarşısında çıxış edib.
"xeberinfo.com" Türkiyədə çıxan "Hürriyet" qəzetinə istinadən xəbər verir ki, sabiq nazir, hazırkı millət vəkili bildirib ki, o, xalqın qarşısına bir daha, tam bəraat aldıqdan sonra çıxacaq.
Gülər deyib: "Şəxsimə, ailəmə, ətrafıma, 40 ildir xidmət etdiyim yerlərin gözəl insanlarına, partiyadaşlarıma, həmsəhərlilərimə hesab verəcəyəm. Bu hesabı vermədən də siyasətə davam etməyəcəyəm. Bunun burada bilinməsini istəyirəm".
Sabiq nazir deyib ki, 2012-ci ilin iyununda xalq onlara mandat verib: "2015-ci ilə qədər yanınızdayıq, canımla, qanımla bu mübarizənin içindəyəm. Hansı sifətlə olursa, olsun, bu partiyanın nəfəri belə olmaq onun şərəfi bizə yetər. Verəcəyimiz hesab konstitusiyaya, qanunlara uyğun olacaq. Biz bu işin nə olduğunu, filmin içində filmin olduğunu bilirik".
M.Gülər bildirib ki, 30 mart seçkiləri artıq bələdiyyə seçkisi olmaqdan çıxıb: "Bu iddianın davam etməsini istəyiriksə, milli iradə qəyyumluq altında qalmasın istəyiriksə, bu seçimi burada edəcəyik".
Sabiq nazir çıxışı zamanı Gülən camaatından da danışaraq deyib ki, qanuni olmayan bir yolla məqsədinə çatmağa çalışanlar təbii ki, bunun qarşılığını görəcəklər: "İkinci Gəzi hadisəsi adlandırıla biləcək hadisələrin fərqindəyik. "İndi imperatorluğun çöküşünü seyr edəcəksiniz" deyənləri xəyal qırıqlığına uğratmaq üçün sizi duyğularımızın və ağlımzıın pərdələnməsinə fürsət verməməyə dəvət edirik".
