AZ
RU
Nazirin bacanağı polisə təslim oldu
Türkiyədə keçmiş nəqliyyat naziri, hazırda AKP-nin İzmir bələdiyyə başqanlığına namizədi olan və bu üzdən nazir postunu təhvil vermiş olan Binəli Yıldırımın korrupsiyada ittiham olunan bacanağı polisə təslim olub.
"xeberinfo.com" Türkiyə qaynaqlarına istinadən xəbər verir ki, bir neçə gündür polis tərəfindən axtarılan və barəsində həbs sanksiyası çıxarılan Cemaləddin Haberdar bu gün saat 13.15-də (Bakı vaxtı ilə.-red) vəkili ilə birlikdə İzmir polis idarəsinin qaçaqmalçılıq və mütəşəkkil cinayətkarlıqla mübarizə şöbəsinə gələrək təslim olub. Onun polisdə ifadəsinin alınmasından sonra növbətçi məhkəməyə çıxarılacağı və barəsində həbs qərarının veriləcəyi gözlənilir. Cemaləddin Haberdar ötən həftə İzmir prokurorluğunun apardığı cinayət işi ilə bağlı axtarışa verilmişdi. Türkiyədə dövlət mülkiyyətində olan dəniz limanlarının işlətməyə verilməsi ilə bağlı müqavilələrdə korrupsiyaya yol verildiyi və rüşvət alındığı ittihamları ilə qaldırılan cinayət işi çərçivəsində 24 məmur və iş adamı həbs olunub. Daha 10 şəxs axtarışdadır.
