Yenixeber.org: Rusiyanın xarici işlər naziri Sergey Lavrov Rus nəqliyyat şirkətlərini Qarabağa dəvət edib. Məlumata görə Lavrov bu fikirləri 17 avqustda Beynəlxalq Avtomobil Daşıyıcıları Assosasiyası ilə görüş zamanı səsləndirib.
Onun sözlərinə görə, Azərbaycanın işğaldan azad edilmiş əraziləri ciddi tranzit potensialına malikdir.

Hazırda bu ərazilərdə yeni infrastruktur layihələr və magistral yolların bərpası istiqamətində işlərin getdiyini qeyd edən Lavrov, Rus avtomobil şirkətlərini bölgəyə daha yaxından nəzər salmağa dəvət edib.

Lavrovun şirkətlərin bu istiqamətə diqqət yetirmələrinin iqtisadi olaraq faydalı olacağını bildirib. Bununla yanaşı nazir, yaxın qoşuluqda baş verən bu prosesin tərkib hissəsi olmağın Rusiya üçün vacibliyini də vurğulayıb.

Lavrovun çıxışı son günlərdə Rusiya və Azərbaycan arasında müşahidə olunan gərginliyin fonunda olduqca diqqət çəkir.
Rusiyanın bu təşəbbüslə nəyə nail olmağa çalışması isə əsas müzakirə mövzularından biridir. Lavrov bu təşəbbüsü ilə Azərbaycanla Rusiya arasında son günlərdə daha da gərginləşən münasibətləri stabilləşdirməyə çalışır.
İki ölkə arasında münasibətlərin gərginləşməsi Rusiyanın Ermənistanı silahlandırması və Qarabağda atəşkəsin pozulmasına şərait yaratması ilə bağlıdır. Rusiyanın 10 noyabr sazişindən irəli gələn öhdəliklərini yerinə yetirmək məsələsində tərəddüdlü davrandığı müşahidə olunur. 

İndiki anda Azərbaycan və Rusiya arasındakı münasibətlərdəki gərginlik hamıdan çox Rusiya üçün zərərlidir. Çünki hər vəsilə ilə prosesə daxil olmağa çalışan Qərb Qarabağla bağlı müzakirələr masasında yer almaqda istəklidir.

Mövcud şəraitdə Azərbaycanla münasibətlərin daha da pisləşməsi Rusiyanın bölgədəki varlığı üçün ciddi təhlükələr doğura bilər.
Azərbaycan Qərblə münasibətləri daha da inkişaf etdirməkdə istəklidir və bu baş verərsə, Rusiyanın təkcə Qarabağdakı yox, bütövlükdə Cənubi Qafqazdakı maraqları təhdid altında düşmüş olacaq. Bu isə Rusiya üçün ən arzuolunmaz ssenaridir.

Rusiya Cənub Qafqazda, xüsusilə də Qarabağda yenidənqurma layihələrində iştirak etmək istəyir.

Azərbaycan işğaldan azad olunmuş ərazilərdə yenidənqurma fəaliyyətlərinə start verib. Bu fəaliyyətlər çərçivəsində bölgəyə xarici sərmayənin və xarici şirkətlərin önəmli layihələrə cəlb olunması prosesi sürətlənir. Bu prosesdə itirak etməkdə birbaşa maraqlı tərəflər isə əsasən Qərb şirkətləridir.

Bu həm bölgəni onların iqtisadi maraq dairəsinə çevirmək, həm də regional təhlükəsizliyin təmin olunması baxımından olduqca önəmlidir. Hazırda bu iş Rusiyanın iştirakı olmadan davam edir və Rusiya faktiki olaraq yenidənqurma prosesindən kənarda qalıb.

Rusiya başa düşür ki, bölgədəki tək təsir vasitəsi sülhməramlı missiyasıdır və bu missiya Rusiyanın daimi olaraq bölgədə qalmasını təmin edə bilməz. Lakin Qərb kimi Rusiya şirkətləri da bölgənin yenidən qurulmasında iştirak edərsə, bu Rusiya üçün yeni iqtisadi imkanlar və maraqlar yarada bilər.
Bu yolla Rusiya bölgədə Qərbin iqtisadi varlığını da tarazlaşdırmaq fürsəti qazana bilər.
Lavrovun təşəbbüsü istənilən halda Rusiyanın bölgədəki proseslərdə daha yaxından iştirak etmək cəhdi kimi qiymətləndirilə bilər.(Bizim.media)