AZ
RU
Eks-deputat Nəriman Əliyevin cəzadan yayınma planları -FOTOLAR
Milli Məclisin 70 saylı Masallı şəhər dairəsindən keçmiş deputatı və "Ştutqart" mağazalar şəbəkəsinin sahibi Nəriman Əliyev haqda uzun müddətdir ki, saytlarda və sosial şəbəkələrdə qalmaqallı xəbərlər paylaşılmaqdadır. Eks-deputat qanunsuz əməllər törətmək, qanundankənar işlər görməklə dəfələrlə gündəmdə oub. Ən son isə keçmiş işçisi Abutalıb Ağayev tərəfindən deputata məxsus olan Nərimanov rayonu, Ələsgər Qayıbov küçəsi 10C ünvanındakı torpaq sahəsində 37 ədəd bir neçə illik ağacın kəsilməsində təqsirləndirilir. Şikayətçi açıqlamalarında bu barədə aidiyyəti orqanlara məktubla müraciət etdiyini və Ekologiya və Təbii Sərvətlər Nazirliyinin əməkdaşlarının əraziyə baxış keçirdiyini bildirib.
Yenixeber.org: Bu məsələ yanvarın 6-da ölkə mətbuatında səs-küy yaratdıqdan sonra Ekologiya və Təbii Sərvətlər Nazirliyi faktı təsdiqləyərək toplanmış materialların artıq Baş prokurorluğa göndərildiyini qeyd edib.
Bütün bunlardan sonra vəziyyətin ciddiləşdiyini, etdiyi hərəkətlərin çox ciddi qanun pozuntusu olduğunu bilən sabiq millət vəkili məsuliyyətə cəlb oluna biləcəyini anladığından, cəzadan yayınmaq üçün müxtəlif yollar fikirləşməyə başlayıb. Saytlara verdiyi açıqlamada əvvəllər hər şeyi təkzib edən Nəriman Əliyev qarşılıqlı ittihamlarla məsələdən yayınmağa çalışıb, bu mümkün olmadıqda isə yeni və daha ciddi planlara əl atıb.
İlk olaraq ölkənin internet televiziyalarından birinə açıqlama verərək, həmin ərazinin onun tərəfindən 2016-cı ildən icarəyə verildiyini və ağacların da icarədarlar tərəfindən ondan xəbərsiz kəsildiyini iddia edir. Ardınca sonradan bu məsələdən xəbəri olduğunu və şikayət etdiyini vurğulayır. Eks-deputat bu uğursuz açıqlama ilə məsuliyyətdən yaxa qurtara biləcəyini düşünür.
Açıqlamanın uğursuz olduğunu şikayətçi tərəf, yəni Abutalıb Ağayev də öz sözləri ilə təsdiqləyir. Şikayətçi qeyd edir ki, hətta icarə verməsi doğru olsa belə, həmin ərazidə Nəriman Əliyevin 3 mərtəbədən ibarət ofisi fəaliyyət göstərir, eks-deputat, demək olar ki, hər gün bu ofisə gəlib-gedir.
"Ərazi güc strukturlarından birinin akademiyasının düz yaxınlığında olduğundan, dörd tərəfdən kameralarla müşayət olunur ki, istənilən vaxt kamera görüntülərindən də Nəriman Əliyevin obyektə gəlib-getdiyi haqda görüntülər əldə etmək mümkündür. Digər tərəfdən, harada görünüb ki, icarədar yer sahibindən xəbərsiz ağac kəssin? Tutalım, belə olub və eks-deputat bundan xəbər tutan kimi də lazımi orqanlara şikayət edib. Bu şikayətlərin hansı tarixdə və kimlərə edildiyi haqda əlindəki faktları niyə ictimaiyyətə açıqlamır?" - şikayətçi sual edir.
Onun sözlərindən belə məlum olur ki, Nəriman Əliyevin qanundan qaçaraq sığınmaq istədiyi “icarədar” elə onun özünə məxsus olan “Ştutqart” mağazalar şəbəkəsidir. Deməli, Nəriman Əliyev özünə məxsus obyekti elə özünə məxsus şirkətə icarəyə verib və özünə məxsus şirkət özünə məxsus ağacları özündən xəbərsiz kəsib. Maraqlı plandır, amma adamı məsuliyyətdən azad edəcək qədər ağıllı düşünülməyib.
Planın işə yaramayacağını Nəriman Əliyevin özü də hiss etdiyindən bu plan alınmayacağı təqdirdə ikinci bir planla məsuliyyətdən yayınmaq fikrindədir. Bu haqda “Ştutqart” mağazalar şəbəkəsində çalışan və adının çəkilməsini istəməyən mənbə redaksiyamıza məlumat verib. Plan isə sadə və klassikdir - işçilərin içindən “suç keçisi” tapmaq və bütün məsuliyyəti onun boynuna yükləmək.
Nəriman Əliyev neçə illik işçisi, “Ştutqart” mağazalar şəbəkəsinin mühafizə xidmətinin rəisi, bacısı qızının yoldaşı olan Zaidov Nicat Hakim oğlunu yanına çağıraraq baş verənlərdən narahatlığını bildirib. Çıxış yolu qalmazsa, ağacların kəsilməsi ilə bağlı bütün məsələlərin Nicat tərəfindən edildiyini deyəcəyini bildirib. Yaxın qohum və neçə ildir Nəriman Əliyevin hesabına dolanan Nicat isə bütün bunlara hazır olduğunu, məsuliyyəti öz boynuna götürüb həbsə belə getməyə razı olduğunu bildirib. Mənbəmizin bildirdiyinə görə, eks-deputat tərəfindən Nicat Zaidovun “qurban” seçilməsi də təsadüfi deyil. Belə ki, ”Ştutqart” sahibinin bütün qanunsuz işləri məhz bu adamın iştirakı və nəzarəti altında aparılıb. Əlbəttə, bütün tapşırıqlar Nəriman Əliyevdən gəlmək şərti ilə…
Baş prokurorluğun məsələ ilə bağlı açıqlamasından sonra eks-deputatın narahatlığı anlaşılandır. Hadisələri nəzərə alaraq, yaxın vaxtlarda daha bir eks-deputatın məsuliyyətə cəlb olunacağı, hətta həbs oluna biləcəyini proqnozlaşdırmaq o qədər də çətin deyil. Amma proqnozlardansa, yaşayıb görmək ən yaxşısıdır. Necə deyərlər, yaşayarıq, görərik.(index.az)
