ABŞ-Rusiya məsləhətləşmələri qapalı formatda keçirilib -  Tərəflər görüşün “konstruktiv” keçdiyini bəyan ediblər

Yenixeber.org: İstanbulda Rusiya ilə ABŞ nümayəndələri arasında keçirilən danışıqlar yekunlaşıb. Qeyd edək ki, dünən İstanbulda Rusiya-Amerika məsləhətləşmələrinin ikinci raundu baş tutub. Görüş təxminən 6 saat davam edib.

Rusiya nümayəndə heyətinə ABŞ-dakı səfir Aleksandr Darçiyev başçılıq edib, Amerika tərəfində isə müzakirələrdə dövlət katibinin Avropa və Avrasiya məsələləri üzrə köməkçisinin müavini Sonata Kulter iştirak edib. Məsləhətləşmələr qapalı formatda keçirilib.

Görüşdən sonra Dövlət Departamenti danışıqların konstruktiv şəkildə keçdiyini açıqlayıb və tərəflərin diplomatik nümayəndəliklərə bank xidmətləri ilə bağlı məsələləri müzakirə etdiklərini bəyan edib.

Məsləhətləşmələrdə Rusiya nümayəndə heyətinə rəhbərlik edən Rusiyanın Vaşinqtondakı səfiri danışıqların “müsbət atmosferdə” keçdiyini və “iki ölkə prezidentlərinin qarşıya qoyduğu vəzifənin həllində irəliləməyə imkan verdiyini” deyib.

“İstanbuldakı məsləhətləşmələr ABŞ və Rusiya səfirliklərinin işini normallaşdırmaqda irəliləməyə imkan verdi”, Darçiyev qeyd edib.

Rusiya Federasiyası və ABŞ-ın nümayəndələri səfirliklərin işinin normallaşdırılmasını müzakirə edib və diplomatik nümayəndəliklər üçün maneəsiz bank xidmətlərinin təminatlarını qeyd edən nota mübadiləsi aparıblar.

Həmçinin Darçiyevin sözlərinə görə, tərəflər “əvvəlki Amerika administrasiyasından miras qalmış ciddi qıcıqlandırıcı məsələlərin mövcudluğunu bəyan ediblər ki, bu da etimadı gücləndirmək üçün dərhal aradan qaldırılmalıdır”.

Beləliklə, müzakirə ABŞ hakimiyyət orqanları tərəfindən müsadirə edilmiş diplomatik əmlakın Rusiya Federasiyasına qaytarılmasına keçib. Nümayəndə heyətinin üzvləri müvafiq yol xəritəsi üzərində işləmək barədə razılığa gəliblər.

Bundan əlavə, Rusiya və Amerika diplomatları birbaşa hava nəqliyyatının bərpasını müzakirə edib və ABŞ və Rusiyada diplomatların gediş-gəlişini asanlaşdırmaq üçün tədbirlər haqqında razılığa gəliblər.

Darçiyev həmçinin bildirib ki, Moskva və Vaşinqton növbəti görüş üçün İstanbulda irəli sürülən təşəbbüslər üzərində işləyəcək. Hazırda növbəti görüş vaxtı müzakirə olunur.

İstanbulda keçirilən danışıqlardan sonra Rusiya və ABŞ səfirliklərə fasiləsiz bank və maliyyə xidmətlərinin göstərilməsinə dair öhdəliklərə dair nota mübadiləsi aparıblar.

“Nümayəndə heyətləri Rusiya və Amerika diplomatik nümayəndəlikləri üçün fasiləsiz bank və maliyyə xidmətlərinin asanlaşdırılması, habelə Rusiyanın BMT və digər beynəlxalq təşkilatların büdcələrinə töhfələrinin yerinə yetirilməsi üzrə qarşılıqlı öhdəliklər barədə əldə edilmiş razılaşmanı təsdiqləyən nota mübadiləsi aparıblar”, - deyə Rusiya Xarici İşlər Nazirliyindən bildirilib.

Bundan əlavə, Moskva ABŞ hakimiyyəti tərəfindən müsadirə edilmiş Rusiyaya məxsus 6 diplomatik mülkün geri qaytarılması məsələsini qaldırıb. Tərəflərin lazımi yol xəritəsini hazırlamaq barədə razılığa gəldiyi vurğulanıb.

“Rusiya səfiri Aleksandr Darçiyev bu istiqamətdə təxirəsalınmaz praktiki addımların, o cümlədən Rusiya nümayəndələrinin dəymiş ziyanı yoxlamaq və qiymətləndirmək üçün obyektlərə dərhal girişin vacibliyini xüsusi vurğulayıb”, - nazirliyin məlumatında bildirilib.(AYNA)