Yenixeber.org: Redaksiyamıza Azərbaycan Dövlət Aqrar Universitetinin (ADAU) professor müəllim heyəti adından Murad Tağıyevin Azərbaycan Respublikasının Prezidenti cənab İlham Əliyevə ünvanladığı müraciətin surəti daxil olub. Müraciətdə ADAU-da yaşanan özbaşınalıqlardan və qohumbazlıqlardan bəhs olunur. İddialarla bağlı qarşı tərəfi dinləmək istiqamətindəki cəhdlərimiz nəticəsiz oldu. Aktuallığını nəzərə alıb, müraciəti olduğu kimi dərc edirik:

Cənab Prezident, ADAU-da aparıcı vəzifələri qəsb etmiş məlum bir qrup şəxs  əsas  qanunları  və  dövlətin  təhsil strategiyasını ayaqlar altına sərərək qanunazidd əməllərlə məşğuldur. Bu şəxslər aqrar mütəxəssis hazırlığında elmi potensiala  gerilikçi  davranışları ilə maliyyə və inzibati maxinasiyalara qorxmadan imza atırlar. Son  dövrlərdə  mətbuada  gedən  silsilə  şikayət  və  müraciətlərdən  aydındır  ki, Azərbaycan Dövlət Aqrar Universitetində  rüşvətxorluq, özbaşınlaıqlar və anarxiya baş alıb gedir. 
Biz bu barədə  dəfələrlə müraciət etmişik, kütləvi informasiya vasitələrində həyəcan təbili çalmışıq. Lakin kənd təsərrüfatı  nazirliyi, eləcə də universitet rəhbərliyi  tərəfindən heç bir tədbir görülmədi. Nəticədə bu gün həmin rüşvətxorlardan biri Baytarlıq fakültəsinin dekanı, professor Famil Nəsibov universitetdə korrupsiyaya qarşı aparılan əməliyyatlar çərçivəsində həbs olundu. Famil Nəsibov əslən göyçəlidir. Xaçmaz Rayon İcra başçısı Elnur Rzayevlə dayıoğlu, bibioğludur. Elnur  Rzayevin digər qardaşı Bayandur Rzayev Azərbaycan Respublikasının  Kənd  Təsərrüfatı Nazirliyi yanında Dövlət Baytarlıq Nəzarəti Xidmətinin rəisidir. Bütün bu göyçəliləri İnam Kərimov ətrafına yığıb. Famil  Nəsibov həm də  ADAU-nun yeni rektor əvəzi Zəfər Qurbanovun yaxınıdır. Dəfələrlə mətbuatda  "Aqrar  iqtisadiyyat"  fakültəsinin dekanı Asəf Hacıyevin,"Baytarlıq təbabəti və zoomühəndislik" fakültəsinin dekanı Famil Nəsibovun, "Maliyyə və iqtisadi nəzəriyyə" kafedrasının müdiri, professor Məhərrəm Hüseynovun, “Kənd təsərrüfatı texnikası” kafedrasının  müdiri Aydın İsayevin, “Yerüstü  nəqliyyat  vasitələri və texniki servis” kafedrasının sabiq müdiri Ayaz  Həsənovun, "Aqronomluq" fakültəsinin dekanı  Məhərrəm İsmayılovun, “Kənd təsərrüfatı texnikası” kafedrasının sabiq müdiri Nazim Nadirovun, "Ekologiya"  kafedrasının müdiri Musa Bayramovun  cinayətləri  və  korrupsiya əməlləri haqqında geniş yazılar getmişdir. Universitet rəhbərliyi bunlarla bağlı tədbir görmədiyinə görə daxil olan şikayətlər əsasında  universitetdə   korrupsiya ilə bağlı əməliyyat keçirilmişdir. Nəticədə adları çəkilən əməkdaşlardan Famil Nəsibov bu gün saxlanılmışdır. Amma biz xahiş edirik ki, adları yuxarıda qeyd olunan yoldaşların da fəaliyyəti yoxlanılsın, onların da korrupsiya əməlləri ifşa olunsun. Bu şəxslər elmdən uzaq olmalarına baxmayaraq  rüşvətxorluqla  geniş şəkildə məşğul olurlar.  

  
Nazim  Nadirov  universitetdə kafedra müdiri işlədiyi dövrdə maşın trakor parkını tamamilə satıb dağıtdı. Tələbələrdən külli miqdarda rüşvət yığdı. Rektor əvəzi Zəfər Qurbanovun yanında  iclas zamanı  öz kafedra yoldaşı, professor Qurban Əliyev bu şəxsi  elmdən  bixəbər, alverçi və rüşvətxor kimi xarakterizə etdi. Bu adam  İnam  Kərimov tərəfindən  göyçəli olduğu üçün Aqromexanika Elmi Tədqiqat İnstitutuna  direktor təyin olunmaq  üzrədir. Digər  tərəfdən Nazim Nadirov keçmiş icra başçısı Elmar Vəliyevin də qohumudur. Belə ki, Nazim Nadirovun bibisi Hərbi Prokuror Xanlar Vəliyevin həyat yoldaşıdır. Cənab Prezident! Bu gün Azərbaycan Dövlət Aqrar Universiteti demək olar  ki, idarə edilmir. Bütün  özbaşınalıqların başında duran və bunlara rəvac verən Universitetin aqrar sahədən tam xəbərsiz olan rəhbərliyidir. Bunların yəni, rektor əvəzi Zəfər Qurbanovun, tədris  işləri  üzrə prorektor Əhməd Məlikovun, elmi işlər üzrə prorektor Azad İbrahimovun başı rektorluq uğrunda savaşa qarışıb. Klanlar arasında mübarizə gedir. Bu mübarizədə İnam Kərimov Zəfər Qurbanovu, Mikayıl Cabbarov isə Əhməd Məlikovu dəstəkləyir. Zəfər Qurbanov isə hər vasitə ilə Əhməd Məlikovu aşağılamağa çalışır. Belə ki, o tədris işləri üzrə prorektor olsa da tədris işləri ilə Azad İbrahimov məşğuldur. Əhməd Məlikova isə bir otaq veriblər. Həmin otaqda yazılı imtahanda tələbələrin bileti ilə yazdığı sualları araşdırır ki, görək tələbə imtahanda öz sualını, yoxsa başqa sualı yazıb. 
Bu  şəxslərə, eləcə də onlarn himayədarlarına  çatmır ki, kimin  rektor  təyin olunması haqqında fərmanı ölkə Prezidenti verir. Cənab Prezident! Xahiş edirik, kollektivin xahişini nəzərə alaraq təcili tədbir görəsiniz. Sizə inanırıq və böyük ümidlə nəticə gözləyirik.

Yenixeber.org olaraq yazıda adları hallanan tərəfləri dinləməyə hazırıq.