2014-cü ilin noyabr ayının 1-nə olan məlumata görə, Azərbaycanda fəaliyyət göstərən 44 bankdan 38-i mənfəətlə, 6-sı zərərlə işləyib.

"Xeberinfo.com": Müqayisə üçün bildirək ki, bu ilin aprelində 11, mayında 10 bank, iyun- avqust aylarında isə 8 bank zərərlə işləyirdi. Sentyabr ayında da 6 bank zərər ilə işləyirdi.

“Marja” Mərkəzi Banka istinadən xəbər verir ki, 2014-cü ilin yanvar-oktyabr ayları ərzində mənfəətlə işləyən banklar üzrə bank sisteminin cəmi xalis mənfəəti 393,63 milyon manat, zərərlə işləyən banklar üzə bank sektorunun xalis zərəri isə 32,26 milyon manat təşkil edib. Nəticədə, bank sisteminin yekun xalis mənfəəti 361,37 milyon manat təşkil edib, bu da 2013-cü ilin eyni dövrü ilə müqayisədə 75,62 milyon manat və ya təxminən 26,5% çoxdur.

TƏKCƏ OKTYABRDA 44 MİLYONDAN ÇOX MƏNFƏƏT GÖTÜRÜBLƏR

Oktyabr ayında mənfəətlə işləyən bankların mənfəəti 45,11 milyon manat, zərərlə işləyən bankların zərəri isə 930 min manat artıb. Nəticədə bank sisteminin yekun xalis mənfəəti təkcə oktyabrda 44,18 milyon manat artıb.