«AG Bank» səhmdarlarının pay bölgüsündə ciddi dəyişikliklər baş verib.

Xeberinfo.com:   Belə ki, bankın səhmdarlarının payları dəyişib, eləcə də banka yeni səhmdarlar gəlib. «AG Bank»ın yeni səhmdarlarından biri də Qriqori Marçenkodur. Bankın rəsmi məlumatına görə, Q.Marçenko burada 8,3% paya malik olacaq. Qeyd edək ki, Q.Marçenko adi səhmdar deyil, həm də Müşahidə Şurasının üzvüdür.

Fins.az-ın araşdırması göstərib ki, yeni səhmdar adi şəxs deyil – əslən Qazaxıstandan olan Q.Marçenko nəinki Qazaxıstanın, hətta MDB-nin ən məşhur maliyyəçilərindən biridir.

Qazaxıstanın 1 nömrəli bankiri

Qazaxstanlı bankir və dövlət xadimi Grigori Alexandrovich Marchenko 1959-cu ildə anadan olub və 1992-ci ildən 2013-cü ilədək Qazaxıstanda dövlət qulluğunda çılışıb. Bu dövrdə o Milli Bankın rəhbərindən tutmuş baş nazirin müavini və iqtisadi məsələlər üzrə prezidentin müşavirə qədər yüksək postlarda çalışıb. Q.Marçenkonun fəaliyyətinə nəzər saldıqda onun son 20 i ldə Qazaxıstanın iqtisadi həyatında mühüm rol oynadığını güman etmək olar.
Köməkçidən Milli Bankı rəhbərinə qədər

Belə ki, Qriqori Marçenko 1992-1994cü illərdə Qazaxıstanın vitse-prezidentinin köməkçisi olub. 1994-cı ildə ABŞ-ın Corctaun Universitetində təhsil alıb. 1994-95-ci illərdə Qazaxıstan Milli Bankının sədrinin müavini işləyib, 1995-ci ildə isə Milli Bankın rəhbəri vəzifəsinə keçib. 1996-cı ildə Qazaxıstanda bank sektorunun islahatları başlayıb. 1996-97-ci illərdə Qazaxıstan Respublikası Qiymətli Kağızlar üzrə Milli Komissiyasının sədri olub.

Baş nazirin müavini və Əmanət bankın rəhbəri

1997—99-cu illərdə Qazaxıstan prezidentinin ştatdankənar müşaviri olub. 1997-99-cu illərdə «Deutsche Bank Securities» (Kazakhstan) bankının prezidenti işləyib. 1999-2004-cü illərdə Qazaxıstanın Milli Bankının sədri olub. 2004-cü ilin yanvar-aprel aylarında Qazaxıstan baş nazirinin birinci müavini işləyib.
2004-cı ilin aprelindən oktyabrınadək – Qazaxıstan prezidentinin iqtisadi məsələlər üzrə köməkçisi olub. Paralel olaraq 2005-2009-cu illərdə «Xalq Əmanət Bankının» sədri işləyib. 2004-2009-cu illərdə Qazaxıstan prezidentinin ştatdankənar müşaviri işləyib.

Özü barədə tender elan edən bankir

Dövlət qulluğunu tərk edəndən sonra Q.Marçenko, öz sözlərinə görə, «özü barədə tender elan edib». «Qazaxıstan Xalq Bankı»nın idarə heyətinin sədri və Direktorlar Şurasının üzvü olmaq təklifi ona daha maraqlı görünüb.

Yenidən ölkənin baş bankiri olub

Amma Marçenkonun dövlət qulluğundan kənardakı fəaliyyəti uzun çəkməyib. 2009-cu ildə o yenidən Qazaxıstan Mərkəzi Bankının sədri vəzifəsinə qayıdıb və 2013-cü ilədək bu vəzifəni tutub.

«İlin bankiri» seçilib

Q.Marchenko öz fəaliyyəti dövründə Qazaxıstanın və MDB-nin ən məşhur maliyyəçilərindən biri kimi ad qazanıb. Belə ki, «Euromoney» jurnalı tərəfindən 2003-ci ilin ən yaxşı mərkəzi bank rəhbəri elan olunub. O, həmçinin bir neçə dəfə ilin ən yaxşı maliyyəçisi də seçilib (“the Choice of 2000 of the Republic of Kazakhstan”, “the Choice of 2005 of the Republic of Kazakhstan”). Nəhayət, Q.Marçenko Sinqapur hökuməti və ispaniya Krallığının Almatadakı rəsmi konsuludur.

Putin Marçenkoya nə təklif edib?

Q.Marçenkonun bioqrafiyasında maraqlı nüanslardan biri onun Rusiya prezidenti Vlidimir Putinlə görüşü barədədir. Belə ki, 2003-cü ildə Q.Marchenkonun Rusiya prezidenti Putin və onun iqtisadi işlər üzrə məsləhətçisi Andrey Illarionovla görüşü baş tutub. Görüşdə Putinin Marchenkoya Rusiya Mərkəzi Bankında vəzifə təklif etməyi ilə bağlı şayilər də yayılmışdı.

Valyuta Fondunun sədri ola bilərmiş

2011-ci ilin mayın 19-da isə MDB ölkələri hökumət başçılarının Şurası Q.Marçenkonu MDB ölkələri tərəfindən Beynəlxalq Valyuta Fondunun rəhbəri vəzifəsinə irəli sürüb. HƏmin vaxt BVF-nin rəhbəri Dominik Stross Kan ətrafında yaranmış qalmaqala görə, vəzifəsindən istefa vermişdi.
Bankda Qriqori Marçenkonun səhmdarlar sırasına daxil olmasını böyük razılıqla qarşılayıblar. Burada hesab edirlər ki, onun AG Bankın səhmdarı olması bankın Avropa dəyərlərinə daha sıx inteqrasiya olunmasının göstəricisidir.