Ukrayna ordusu üsyançılar tərəfindən atəş dayandırılmayana qədər ölkənin şərqində cəbhə xəttindən ağır silahları geri çəkə bilməyəcəyəni bildirib.
"Xeberinfo.com":  Məlumata görə, Ukrayna Müdafiə Nazirliyinin rəsmisi Anatoli Stelmax jurnalistlərə bildirib ki, üsyançılar atəşi kəsmir.
Ötən həftəsonu hər iki tərəf, əldə olunmuş atəşkəs razılığı çərçivəsində ağır silahların cəbhə xəttindən çıxarılmasına razılıq vermişdi.
Üsyançıların cəbhə xəttindən ağır silahların geri çəkilməsinə bazar ertəsinə düşən bayram günündən sonra başlayacaqları güman olunur.
Ağır silahların cəbhə xəttindən geri çəkilməsi üçün qarşı duran tərəflərə 2 həftə vaxt verilib.
Ötən həftə strateji əhəmiyyətə malik dəmiryol qovşağı Debaltseve məntəqəsi üsyançılar tərəfindən tutulduqdan sonra fevralın 12-də Minskdə Fransa və Almaniyanın vasitəçiliyilə əldə olunmuş atəşkəs razılığına tərəflərin sonadək əməl edəcəyinə şübhələr artmaqdadır.
BMT məlumatlarına əsasən, Ukraynanın şərqində ötən ildən davam etmiş silahlı münaqişə nəticəsində 5,700 adam həlak olub, 1.5 milyon insan evlərini tərk edib. /BBC