Prezident İlham Əliyevin fərmanı ilə Dövlət Torpaq və Xəritəçəkmə Komitəsi ləğv edilib.

"Xeberinfo.com":   AzərTAc-ın məlumatına görə, Dövlət Torpaq və Xəritəçəkmə Komitəsinin dövlət torpaq kadastrı, yerquruluşu, geodeziya, torpaq bazarının təşkili, dövlət torpaq reyestrini aparmaq, bələdiyyələrin elektron daşıyıcıda və kağız üzərində xəritəni, habelə rübdə bir dəfə bələdiyyələrin hüdudları daxilində dövlət, bələdiyyə və xüsusi mülkiyyətdə olan torpaq sahələrində baş vermiş dəyişikliklər barədə arayışı Azərbaycan Respublikası Prezidentinin Administrasiyasına təqdim etmək sahəsindəki funksiyaları Azərbaycan Respublikasının Əmlak Məsələləri Dövlət Komitəsinə verilir.

Ləğv edilmiş Azərbaycan Respublikasının Dövlət Torpaq və Xəritəçəkmə Komitəsinin torpaqların monitorinqi, onların münbitliyinin bərpası və artırılması, geodeziya, topoqrafiya, xəritəçəkmə, qravimetriya, ərazi vahidlərinin sərhədlərinin müəyyən edilməsi, dövlət əhəmiyyətli coğrafi məlumat sistemlərinin yaradılması, ümumcoğrafi, torpaq, geobotaniki, siyasi-inzibati, elmi məlumat və digər sahələrarası mövzu xəritələrinin, atlaslarının, kartoqrafik tədris vasitələrinin layihələşdirilməsini, tətbiqini və nəşrini təmin etmək, dəqiqliyinə və məzmununa görə ümumdövlət, müdafiə, elmi-tədqiqat və digər məsələlərin həllini təmin edən dövlət topoqrafik xəritələrin, habelə qrafiki, rəqəmi, fotoqrafik və başqa formalı planların yaradılması, yeniləşdirilməsi, nəşri və geodeziya, qravimetriya, topoqrafiya və kartoqrafiya işlərinin həyata keçirilməsində, materialların istifadəsində dövlətin müdafiəsini və təhlükəsizliyini təmin etmək, vahid dövlət koordinat, yüksəklik, qravimetrik ölçmə sistemlərinin, topoqrafik xəritə və planların miqyas sıralarını təyin etmək və geodeziya, topoqrafiya və kartoqrafiya materiallarının və məlumatlarının metroloji təminatını həyata keçirmək sahəsindəki funksiyaları Azərbaycan Respublikasının Ekologiya və Təbii Sərvətlər Nazirliyinə verilir.
Ləğv edilmiş Dövlət Torpaq və Xəritəçəkmə Komitəsinin Azərbaycan Respublikasının dövlət sərhədlərinin, o cümlədən sərhəd sularının və Xəzər dənizinin (gölünün) Azərbaycan Respublikasına mənsub olan bölməsinin delimitasiyası və demarkasiyası işlərini Azərbaycan Respublikasının Ekologiya və Təbii Sərvətlər Nazirliyi Azərbaycan Respublikasının Dövlət Sərhəd Xidməti ilə birlikdə həyata keçirir.
Azərbaycan Respublikasının Nazirlər Kabinetinə tapşırılıb ki, iki ay müddətində:
Daşınmaz əmlaka növündən asılı olmayaraq mülkiyyət və digər əşya hüquqlarının əmələ gəlməsi və başqasına keçməsinin dövlət qeydiyyatının rəsmiləşdirilməsi zamanı verilən daşınmaz əmlakın dövlət reyestrindən çıxarışın vahid formasına dair təkliflərini hazırlayıb Azərbaycan Respublikasının prezidentinə təqdim etsin;
Torpaq sahəsinin plan və ölçüsünün vahid nümunəsinə və təsvirinə dair təkliflərini hazırlayıb Azərbaycan prezidentinə təqdim etsin;
Prezidentin aktlarının bu Fərmana uyğunlaşdırılması ilə bağlı təkliflərini iki ay müddətində hazırlayıb Azərbaycan Respublikasının Prezidentinə təqdim etsin;
Nazirlər Kabinetinin normativ hüquqi aktlarının bu Fərmana uyğunlaşdırılmasını üç ay müddətində təmin edib Azərbaycan Prezidentinə məlumat versin;
Mərkəzi icra hakimiyyəti orqanlarının normativ hüquqi aktlarının bu Fərmana uyğunlaşdırılmasını nəzarətdə saxlasın və bunun icrası barədə beş ay müddətində Azərbaycan Respublikasının prezidentinə məlumat versin;
Ədliyyə Nazirliyi isə mərkəzi icra hakimiyyəti orqanlarının normativ hüquqi aktlarının və normativ xarakterli aktların bu fərmana uyğunlaşdırılmasını təmin edib Nazirlər Kabinetinə məlumat verəcək.

Qeyd edək ki, Dövlət Torpaq və Xəritəçəkmə Komitəsinin ləğvi ilə bağlı məsələ uzun müddət idi ki, müzakirə gedirdi. Hətta Əmlak Məsələləri Dövlət Komitəsinin sədri Kərəm Həsənovun Qərib Məmmədovun komidtəsini də öz nəzarətinə keçirməyə çalışdığı iddia olunurdu. Fərmmanla Dövlət Torpaq və Xəritəçəkmə Komitəsinin bir sıra funksiyası Əmlak Məsələləri Dövlət Komitəsinə verilsə də, bunun Kərəm Həsənovun istəyilə baş tutduğunu iddia etmək olmaz.
Fərmanın indi verilməsinin səbəbi kimi, fikrimizcə, ölkə rəhbərliyinin büdcə yükünü azaltmaq üçün dövlət aparatında struktur ixtisarlarını həyata keçrməyə başlamasını göstırmək daha doğru olar. Yada salaq ki, bu yaxınlarda Bakı Şəhər Vergilər Departamenti ləğvi edilmişdi. Görünür, neftin qiymətinin düşməsinin büdcədə gərginlik yaratmaması üçün, hökumət büdcədən maliyyələşən dövlıət qurumlarının sayını mümkün qədər azaltmaq qərarına gəlib. Buna görə də yaxın vaxtlarda daha bir neçə qurumun ləğvinin şahidi ola bilərik.