“Azadlıq” radiosunun Bakı bürosunun ofisi möhürlənəndən sonra onun əməkdaşları kütləvi şəkildə prokurorluğa çağırılır.

"Xeberinfo.com":  Bu barədə radionun saytında məlumat yerləşdirilib.
“Prokurorluq əməkdaşları jurnalistləri hətta gecə saatlarında da dindirməyə cəhd edirlər…Artıq əməkdaşlardan bir neçəsi, hətta müxtəlif bölgələrdə çalışan müxbirlərimizi yerli prokurorluqlara çağırıb dindirirlər”, – deyə məlumatda qeyd olunur.
Vəkil Yalçın İmanov bildirib ki, jurnalistlərin tez-tələsik kollektiv şəkildə istintaqa cəlb edilməsinin niyyətini anlamaq çətindir. Dindirilməyə çağırılan bu sayda jurnalistlə müqavilələrin imzalanması, etibarnəmələrin hazırlanması iş günü olmadığı üçün zaman tələb edir: “Ağır Cinayətlərə dair İşlər üzrə İstintaq İdarəsinin müstəntiqi İqbal Hüseynov bununla bağlı mənə də zəng etdi. İzah etdim ki, jurnalistlərin vəkilin iştirakı olmadan dindirilməsi bizə qeyri-hüquqi niyyətlərdən xəbər verir. Ona görə də hər kəsin vəkillə təmin olunması üçün bir qədər zaman verilməsini istədik. Hələlik jurnalistlərin dindirilməsinin gələn həftənin əvvəlinə saxlanmasına ilkin olaraq razılaşıblar”.