Sabiq bankir Cahangir Hacıyev 21 nəfərlə birlikdə növbəti dəfə hakim önünə çıxarılıb. Musavat.com xəbər verir ku, “Azərbaycan Beynəlxalq Bankı” ASC-nin İdarə Heyətinin sabiq sədri Cahangir Hacıyev və onunla birlikdə ittiham edilən şəxslərin cinayət işi üzrə məhkəmə iclası Bakı Ağır Cinayətlər Məhkəməsində baş tutub.

Yenixeber.org: Hakim Faiq Qəniyevin sədrliyi ilə keçirilən prosesdə ifadə verən şahid Gündüz Məmmədov bildirib ki, 2008-2011-ci illərdə Azərbaycan Beynəlxalq Bankının Kartlar Departamentinin rəhbəri işləyib. Həmçinin Kredit Komtəsinin üzvü olub.

Sərbəst ifadəsində Məmmədov deyib ki, hazırda bankın “Abşeron” filialında müdir müavini vəzifəsində çalışır. O, Kredit Komitəsində lahiyələr üçün ayrılan kreditlərə imza atdığını deyib: “Kredit Komitəsi kreditlərin verilməsinə nəzarət edən qurum olub. Ayrılan kreditlərin limitinin nə qədər olduğunu xatırlamıram. Təxminən 100 min manatlıq kreditlər idi. Layihələrə kreditlərin verilməsinə bankın müşahidə şurası nəzarət edirdi”.

Şahidin istintaqa ifadəsi ilə indiki ifadəsi arasında ziddiyyət olub. Məhkəmədə bildirilib ki, G.Məmmədov istintaqda 1,5 milyon manatlıq layihələr üçün verilən kreditlərə imza atdığını deyib.

Şahid qismində Beynəlxalq Bankın Aktivlər və Passivlər Departamentinin katibi Həsən Həsənzadə dindirilib. O, ötən il işdən ayrıldığını bildirib və ifadəsində qeyd edib ki, Aktivlər və Passivlər Departamenti formal qurum olaraq işləyib və əksər hallarda iclaslarda iştirak etməyib: “Elə hallar da olurdu ki, iclaslar keçirilmirdi, lakin veksellərlə bağlı protokollar tərtib edilirdi. Bankın sədri Cahangir Hacıyev də imzalayırdı. Cahangir Hacıyev göstəriş verdi ki, Xəzinadar Departamentindən təqdim edilən sənədləri siyahıya daxil edim. Mən də onun dediklərini edirdim”.

Məhkəmədə “İntertekstil” şirkətinin sabiq rəhbəri Şakir Musayev də dindirilib. O, istintaqa verdiyi ifadəni təsdiq etdiyini söyləyib.

Ş.Musayev deyib ki, təqsirləndirilən Dünyamin Xəlilovun göstərişi ilə onun şirkətinin işçilərinin adına bankdan 5 milyon manatdan artıq kredit götürülüb: “Dünyamin müəllim zəng etdi. Mən də mühəndis İlham Ağaverdiyevə dedim ki, işçiləri banka göndərsin və sənədlərə imza atsınlar. Göstərişləri Dünyamin Xəlilovdan almışam”.

Xatırladaq ki, zərərçəkmiş qismində Beynəlxalq Bankla yanaşı, Aqrokredit bank və Vergilər Nazirliyi tanınıb. Həbs edilənlərdən biri C.Hacıyevin dostu, hazırda həbsdə olan Dünyamin Xəlilovdur. İsmayıl Hidayətzadə təqsirləndirilən şəxsdir. O, C.Hacıyevin bacanağıdır və “İntertabakko” Zaqatala Tütün Emalı Zavodunun direktoru vəzifəsində işləyib. Hidayətzadə “Azərbaycan Beynəlxalq Bankı” ASC-dən kredit götürərək qaytarmamaqda günahlandırılıb və 5 il cəza alıb.

Digər şəxslər isə Camal Həsənov, Sərxan Rəsulov, Natiq İmanov, Samir Hacıyev, Təbriz Əbdülhəmidov, Mahir Qaffarov, Sadıx Murtuzayev, Tərlan Məhərrəmov, Fəxrəddin Heybətov, Ramin Əhmədov, Mariz Muradov, Səlahəddin Qədirov, Erxan Cavad, Arif Ramazanov, Navai Şirinov, Svetlana Əsədullayeva, Arif Mədətov, Adil Mikayılov, Ramis Kərimovdur. Onların barəsində mənimsənmə ittihamı irəli sürülüb.

Rəsmi məlumata görə, aparılmış istintaqla 2001-2015-ci illərdə “Azərbaycan Beynəlxalq Bankı” ASC-nin İdarə Heyətinin sədri vəzifəsində işləmiş C.Hacıyevin göstərişləri əsasında ayrı-ayrı ölkələrdə yaradılmış hüquqi şəxslərlə real dəyəri olmayan sadə veksellərin alqı-satqısına dair 3,4 milyard ABŞ dolları və 987 milyon avro məbləğində (müvafiq dövrün məzənnəsi ilə 3,8 milyard manat) müqavilələr bağlanılaraq qanunsuz veksel əməliyyatları aparılmasına dair əsaslı şübhələr müəyyən edilib.

Bundan başqa, istintaqla C.Hacıyevin göstərişləri əsasında həmin dövrdə qeyriləri vasitəsi ilə çoxsaylı kredit müqavilələri bağlanaraq manat və xarici valyutalarla rəsmiləşdirməklə 900 milyon manat həcmində pul vəsaitinin bankdan digər hesablara köçürülərək mənimsənilməsinə dair əsaslı şübhələr müəyyən edilib.

Aparılmış istintaqla C.Hacıyevin tanışı Dünyamin Xəlilov, digər 20 nəfər və qeyriləri ilə birlikdə qanunsuz maliyyə əməliyyatları aparılan və real dəyəri olmayan veksellərin alınması, eləcə də təminatı olmayan kreditlərin verilməsi yolu ilə ümumilikdə 4,7 milyard manat məbləğində pul vəsaitinin mənimsəmə və digər cinayətlər yolu ilə 2,5 milyard manat hissəsini ələ keçirməklə cinayət yolu ilə əldə edilmiş həmin vəsaitin 2 milyard manatını leqallaşdırmasında, digər 2,2 milyard manat məbləğində pul vəsaitinin isə müxtəlif əməliyyatlara yönəltməklə “Azərbaycan Beynəlxalq Bankı” ASC-yə ziyan vurmasına əsaslı şübhələr müəyyən edilib.