Yenixeber.org: “Hazırda pandemiyanın davam etdiyi, qlobal miqyasda yoluxma səviyyəsinin artdığı bir şəraitdə qərara alınıb ki, bu il (hicri 1441-ci il) Həcc ziyarəti Krallığın daxilindəki müxtəlif ölkə vətəndaşları arasından buna istəyi olanların iştirakı ilə çox məhdud sayda təşkil olunsun”, Bu barədə Səudiyyə Ərəbistanı Krallığının Azərbaycandakı Səfirliyindən Qafqaz Müsəlmanları İdarəsinə (QMİ) məktubunda deyilir. 

Sənəddə bu addım bu ayini sağlamlıq cəhətdən təhlükəsiz formada həyata keçirməyə səy göstərməklə əsaslandırılır. 

“Bu, İslam şəriətində insan həyatının Allahın izni ilə qorunması hökmünə əsasən profilaktik tələblər, lazımi sosial məsafə, insan sağlamlığının qorunmasının təmini üçün həyata keçirilib”, deyə sənəddə vurğulanır.

Azərbaycan Həcc Missiyasının təşkilatçısı olan Qafqaz Müsəlmanları idarəsi isə  Səudiyyə Ərəbistanı  Krallığı Həcc və Ümrə Nazirliyinin bəyanatını təqdir etdiyini bildirir. 

Xatırladaq ki, Həcc ziyarəti bu il iyulun 20-dən avqustun 15-inə kimi davam edəcəkdi. Hər il bu məqsədilə Məkkə və Mədinə şəhərlərinə islam ölkələrindən milyonlarla zəvvar ziyarətə gəlirdi.