Türkiyə Cümhuriyyətinin (TC) prezidenti Rəcəb Tayyip Ərdoğan iyunun 8-də Amerika Birləşmiş Ştatlarının (ABŞ) prezidenti Donald Trampla baş tutmuş telefon danışığının yekunlarına əsasən bəyan edib ki, iki ölkənin liderləri «bəzi məsələlər» barədə razılığa gəliblər. Telefon söhbəti başlıca olaraq, Liviyada vəziyyətə həsr olunub.

Yenixeber.org: Əldə olunmuş razılığın mahiyyətinə aydınlıq gətirmədən, Ərdoğan TRT dövlət telekanalına verdiyi müsahibədə bildirib ki, bu razılaşma Türkiyə və ABŞ arasında münasibətlərdə «yeni dövr»ə yol aça bilər.

«Bizim telefon danışığımızdan sonra Türkiyə və ABŞ arasında yeni dövr başlana bilər. Biz, bəzi məsələlər barədə razılığa gəldik» - Ərdoğan bildirib.

Ağ Evin bəyanatında isə deyilir ki, Tramp və Ərdoğan Liviyadakı silahlı münaqişəni və Suriya məsələsini daha geniş miqyasda müzakrə ediblər.

Xəbər verildiyi kimi, Misir bazar ertəsindən başlayaraq, Liviyada atəşin dayandırılmasına çağırıb. Təşəbbüs Misir prezidenti Abdül Fəttah əs-Sisidən gəlib. Liviyada marşal Xəlifə Həftarı dəstəkləyən digər xarici güclər - Rusiya, Səudiyyə Ərəbistanı, Birləşmiş Ərəb Əmirliyi də bu təklifi dəstəkləyib. Ancaq Ərdoğan Misirin «sülh planı»nı rədd edib və bu ölkədə Həftar üzərində tam qələbəyə qədər hərbi əməliyyatların davam edəcəyini bildirib.

Türkiyə liderinin sözlərinə görə, yaxın vaxtda onun Rusiya prezidenti Vladimir Putinlə telefon danışığı olacaq. Söhbətin gedişində Ərdoğan Həftara Rusiya təyyarələrinin və «Pansir» HHM vasitəsi göndərilməsi məsələsini qaldırmaq niyyətindədir.

«Onların (LMO-red.) «Pansir»i var, onlar (Rusiya hakimiyyəti - red.) Liviyaya 19 hərbi təyyarə göndəriblər. Putinlə danışandan sonra, biz, gələcək fəaliyyətimizi planlaşdıracağıq» - Ərdoğan qeyd edib.