Ermənistanın Rusiyadan ayrılması Türkiyənin ölkədə təsirinin artmasına gətirib çıxaracaq ki, bu da İrəvan üçün sərfəli ola bilməz.

Yenixeber.org: Bunu Ermənistanın sabiq prezidenti Robert Koçaryanın oğlu, Ermənistan parlamentinin deputatı Levon Koçaryan “Sputnik”-ə müsahibəsində deyib.

Parlamentdəki müxalif rusiyapərəst və revanşist qüvvələri təmsil edən L.Koçaryan deyib ki, tarixən Rusiya, Türkiyə və İran Cənubi Qafqaz regionunda nüfuzlu oyunçular olub. Onun fikrincə, əgər Rusiya regiondan çıxarılsa, onun yerini başqası tutacaq və çox güman ki, bu, Türkiyə olacaq.

Deputatın fikrincə, əhalinin əksəriyyəti bunun Ermənistan üçün sərfəli olmadığını başa düşür.

Köçəryan qeyd edib ki, hakimiyyət hələ də Ermənistan iqtisadiyyatının Rusiya ilə nə qədər bağlı olduğunu anlamır: “Başqa ölkələrin istənilən, hətta fövqəladə yardımı Rusiya Federasiyası ilə münasibətlər pozulduqda yaranacaq boşluqları bağlaya bilməyəcək. Həqiqətən də respublikada çox ciddi iqtisadi problemlər yaranacaq”.