AZ
RU
.jpg)
Ceyhun Bayramov Antalyaya niyə gedib –İstirahətə, yoxsa işləməyə?
Azərbaycan Respublikasının xarici işlər naziri Ceyhun Bayramov Antalyaya gedib.
Yenixeber.org: XİN bu barədə məlumat yayıb.
Yayın bu cıracırında Antalyaya gedənlər əsasən Ağ dəniz sahillərində yayın ləzzətini çıxarmağa çalışırlar. Amma nazir həmin sanatoriya mərkəzinə keyfə yox, diplomatik fəaliyyətlə məşğul olmağa gedib. Lap məşhur şairlərimizdən birinin dediyi kimi:
“Məcnun dərd əlindən dağa çıxdı,
Dedilər: “bəxtəvər yaylağa çıxıb”.
Məlumata görə, nazir Ceyhun Bayramovun səfərinin məqsədi Antalya Diplomatiya Forumunda iştirak etməkdir. Onun Antalya Diplomatiya Forumunda çıxışı, habelə həm Türkiyə tərəfinin rəsmiləri, həm də Forumda iştirak edən xarici nümayəndələr ilə çoxsaylı ikitərəfli görüşlərinin keçirilməsi nəzərdə tutulur.
Bəs, Antalya Diplomatiya Forumu nədir, nə məqsədlə keçirilir?
Ovqat.com-un məlumatına görə, ötən ildən etibarən Türkiyənin təşəbbüsü ilə təsis olunan bu forum dünyanın hər yerindən dövlət və hökumət başçıları, xarici işlər nazirləri, regional və beynəlxalq təşkilatların nümayəndələri, iş və fikir adamlarını, alimləri bir araya gətirmək üçün nəzərdə tutulub.
Türkiyə Prezidenti Rəcəb Tayyib Ərdoğanın himayəsi və ölkənin Xarici İşlər Naziri Mövlud Çavuşoğlunun ev sahibliyi ilə keçirilməsi planlaşdırılan forum dünya gündəmindəki ən əhəmiyyətli regional və qlobal məsələlərinin həll mərkəzi kimi fəaliyyət göstərməyi qarşısına məqsəd qoyub. Xarakter etibarilə Davos platformuna bənzəyən forumda ötən il koronavirus pandemiyasının yayılması səbəbindən video-konfrans şəklində keçirilmişdi. Bu il isə sabahdan başlayaraq iyunun 20-nə qədər davam etməsi planlaşdırılan forumun mövzusu "İnnovativ Diplomatiya: Yeni Dövr, Yeni Yanaşmalar” olacaq.
Builki forumda 12 dövlət və hökumət başçısının, 47 xarici işlər nazirinin, ümumilikdə isə 1300 qonağın iştirakı gözlənilir. Türkiyə Prezidenti Rəcəb Tayyib Ərdoğanın da foruma qatılacağını bildirilir.
İldə bir dəfə keçirilməsi planlaşdırılan forumun bundan sonrakı tədbirlərinin iyun ayında deyil, mart ayında keçirilməsi nəzərdə tutulur.
Qısası, Xarici İşlər naziri Ceyhun Bayramov gələcəyin ən önəmli fikir platforması olmaq iddiası ilə ortaya çıxan beynəlxalq tədbirin ilk canlı iştirakçısı adını qazana bilər. Odur ki, istirahət mövsümündə işləyə-işləyə tər tökməyə dəyər.
