“Ukrayna Rusiyanın yeganə hədəfi deyil. Əslində, daha böyük narahatlıq Gürcüstanla bağlıdır”. 

"Xeberinfo.com":  Musavat.com-un məlumatına görə, belə bir xəbərdarlıq “Foreign Policy” nəşrinin siyasi şərhçisi Maykl Sesaypın məqaləsində yer alıb.
Müəllifin fikrincə, Tiflis Rusiyanın hökmranlığından qaçıb, Avroatlantik strukturlara iddia eləsə də, Kremlin ərazi işğalı önündə Qərbin hərəkətsizliyi öz mənfi effektini verməkdədir.
“Gürcülər on illiklərlə şokda olublar ki, Rusiya onların ərazisinin 20 faizini işğal edib, 300 min nəfərini etnik təmizlənməyə məruz qoyub, ancaq indi bəzi qruplar soruşmağa başlayıblar ki, Qərblə sıx əlaqələr naminə bütün bu itkilərə dəyərdimi? Gürcülər çox tez-tez suala mənfi cavab verirlər”, – deyə o, məqalədə qeyd edir.
Şərhçinin müşahidəsinə görə, müəyyən qrupların və təşkilatların, habelə maliyyənin hesabına Rusiyanın Gürcüstana təsiri güclənir.
“Di gəl, Vaşinqtondakı dəyirmi masalarda, özəl söhbətlərdə Qərb məmurları və ekspertləri Rusiyanın Gürcüstanda kök atmasına yönəlik təbliğatının əhəmiyyətini kiçildirlər” – deyə müəllif bildirib.
“Gürcüstanın qərbyönlü oriyentasiyasına avtomatik əmin olmaq zaman bitir. Rusiyanın ucqarlara təsirləri yenidən dirçəlir və Gürcüstan Moskvadan ötrü arzu olunan qənimət kimi qalmaqdadır” – deyə analitik əlavə edib.