Azərbaycan Texnologiya Universiteti publik hüquqi şəxsi dəftərxana və təsərrüfat mallarının satınalınması üzrə 20.05.2025-ci ildə başladığı kotirovka sorğusuna yekun vurub. Müsabiqənin qalibi “CAUCASİAN SUPPLİES” Məhdud Məsuliyyətli Cəmiyyəti seçilib ə tərəflər arasında 26.793,08 manat məbləğində satınalma müqaviləsi bağlanılıb. Məlumat satınalmaların portalında 30.07.2025-ci ildə dərc edilib.

Yenixeber.org: Satınalmaların portalı üzərindən apardığımız araşdırma zamanı bəlli oldu ki, bu Azərbaycan Texnologiya Universiteti ilə “CAUCASİAN SUPPLİES” MMC arasında bağlanan ilk satınalma müqaviləsi deyil. Belə ki, tərəflər arasında 07.05.2025-ci ildə abadlaşdırma mallarının satınalınması üzrə bir müqavilə də bağlanılıb ki, onun dəyəri 2.793,06 manat olub.

Dövlət Vergi Xidmətinin hüquqi şəxslərin dövlət reyestrinə daxil edilmiş məlumatlarında “CAUCASİAN SUPPLİES”  (VÖEN: 1507070551) Məhdud Məsuliyyətli Cəmiyyətinin 15.01.2025-ci il tarixdə Bakı şəhəri Lokal Gəlirlər Baş İdarəsində dövlət qeydiyyatına alındığı göstərilir. Reyestr məlumatlarında nizamnamə kapitalı 100 manat olan MMC-nin hüquqi ünvanının BAKI ŞƏHƏRİ, NƏRİMANOV RAYONU, NAZİM HACIYEV, ev.22A, m.6, qanuni təmsilçisi kimi isə  Cabbarova Əminə Mübariz qızı qeyd olunub.

Satınalmaların portalına yerləşdirilmiş və Dövlət  Vergi xidmətinin məlumatlarından da göründüyü kimi Azərbaycan Texnologiya Universiteti cəmi dörd ay əvvəl dövlət qeydiyyatına alınmış “CAUCASİAN SUPPLİES” MMC ilə müqavilə bağlayıb. Bundan sonra nələr baş verib?

“CAUCASİAN SUPPLİES” MMC birdən birə satınalmalarda parlamağa başlayıb və 07.05.2025-ci ildən 30.07.2025-ci ilə qədər, son iki ayda müxtəlif dövlət qurumlarından 15 kotirovka sorğusu udub.

Məsələn MMC  Azərbaycan Diasporla İş üzrə Dövlət Komitəsinə 39.925,3 manat dəyərində hədiyyələr və hədiyyə tipli süvenirlər satıb. Qəbələ rayon İcra Hakimiyyətinə isə Qəbələ-Hacıallı aeroport yolunun işıqlanması üçün 4.720 manat dəyərində lampa və elektrik malları satıb.

Sumqayıt şəhər İcra Hakimiyyəti Başçısının Hacı Zeynalabdin qəsəbəsi üzrə nümayəndəliyinə 4.492,5 manat dəyərində təmir mal-materialları, 9.392,8 manat dəyərində ofis malları satıb.

Ucar rayon İcra Hakimiyyəti başçısının Ucar şəhər inzibati ərazi dairəsi üzrə nümayəndəliyinə isə 548,7 manat dəyərində nəqliyyat vasitələrinə ehtiyyat hissələri, 44.997,88 manat dəyərində isə dəftərxana və təsərrüfat malları, mətbəə malları, maşın və avadanlıq, şəhərdə şəhər işıqlanması ilə bağlı mallar satıb.

“Dəmir Yolu və Metropoliten üzrə Bakı Dövlət Peşə Təhsil Mərkəzi” publik hüquqi şəxsə 5.121,2 manat dəyərində müşahidə kameraları satan MMC daha sonra Azərbaycan Texniki Universitetinə 22.470,74 manat dəyərində yumşaq inventarlar və idman malları satıb.

“CAUCASİAN SUPPLİES” MMC daha sonra Naxçıvan Yaşıllaşdırma Xidmətinə 8.578,6 manat dəyərində kompüter, printer və digər avadanlıqlar,  Kənd Təsərrüfatı Nazirliyinin Bitki Mühafizə və Texniki Bitkilər Elmi Tədqiqat İnstitutuna 74.979,56 manat dəyərində bir sıra mallar, Şəmkir rayon İcra Hakimiyyətinə isə 9.994,6 manat dəyərində maşın və avadanlıqlar satıb.

Son iki ayda satınalmaların portalına yerləşdirilmiş bu məlumatlardan da görsəndiyi kimi “CAUCASİAN SUPPLİES” MMC satınalmalarda bütün sahələrə baş vurub və qalib çıxıb. Buradan suallar yaranır. Bu MMC -nin qalibi olduğu dövlət sifarişlərini yerinə yetirməyə, qanunda təchicatçılara dair nəzərdə tutulmuş xüsusi tələblərə cavab verirmi?

Qanunla təchizatçının satınalma müqaviləsinin icrası üçün müvafiq sahədə peşəkarlığının və təcrübəsinin olması; satınalma müqaviləsinin icrası üçün maliyyə imkanlarının və ödəmə qabiliyyətinin olması; texniki imkanlarının və maddi-texniki bazasının olması; müvafiq tələblərə cavab verən işçi qüvvəsinin olması mütləqdir.

Amma bu kimi hallar dövlət satınalmalarında adi hala çevrilib. Belə universal MMC-lər bəzi məmur və yüksək vəzifəli şəxslər tərəfindən formal yaradılır, satınalmalar xətti ilə həyata keçirilən işlərdə dövlətə hərtərəfli ziyan vururlar. Bu şirkətlərin heç bir işçisi olmur,  həm vergilərdən yayınır, həm dövlətə heç bir sosial ödəniş etmir, həm də dövlət vəsaitlərinin təyinatından kənara yönəldilməsində vasitəçi olurlar. Digər tərəfdən də, satınalmalarda iştirak etmək istəyən sadə fiziki və ya hüquqi şəxslərin qarşısında baryer olub, onların inkişaf etməsini əngəlləyirlər. Nəzarət orqanı olaraq müəyyən edilmiş Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi isə bunlara sadəcə seyrçi olaraq nəzarət edir.(aktualinfo.org)

       ***

Bu gün (20.08.2025) Yenixeber.org-un elektron poçtuna yazıda yer alan iddialrla bağlı qarşı tərəfin cavabı daxil oldu. Məlum qanun və prinsiplərə uyğun olaraq cavabı olduğu kimi dərc edirik:

                “Caucasian Supplies” MMC-nin dövlət satınalmalarındakı fəaliyyəti

Azərbaycan Texnologiya Universiteti publik hüquqi şəxsi 20.05.2025-ci ildə başladığı dəftərxana və təsərrüfat mallarının satınalınması üzrə kotirovka sorğusuna yekun vurub. Müsabiqənin qalibi “Caucasian Supplies” Məhdud Məsuliyyətli Cəmiyyəti seçilib və tərəflər arasında 26.793,08 manat məbləğində satınalma müqaviləsi bağlanıb. Bu məlumat 30.07.2025-ci ildə satınalmalar portalında dərc edilib.

Qeyd edək ki, bu, Azərbaycan Texnologiya Universiteti ilə “Caucasian Supplies” MMC arasında imzalanan ilk müqavilə deyil. Daha əvvəl, 07.05.2025-ci ildə universitetlə şirkət arasında abadlaşdırma mallarının satın alınması üzrə 2.793,06 manat dəyərində müqavilə bağlanıb.

Dövlət Vergi Xidmətinin hüquqi şəxslərin dövlət reyestrindəki məlumatına görə, “Caucasian Supplies” (VÖEN: 1507070551) MMC 15.01.2025-ci il tarixində Bakı şəhəri Lokal Gəlirlər Baş İdarəsində dövlət qeydiyyatına alınıb. Nizamnamə kapitalı 100 manat olan şirkətin hüquqi ünvanı Bakı şəhəri, Nərimanov rayonu, Nazim Hacıyev küçəsi 22A, mənzil 6-dır. Şirkətin qanuni təmsilçisi Cabbarova Əminə Mübariz qızıdır.

Qeyd olunan tarixdən etibarən şirkət müxtəlif dövlət qurumlarının kotirovka sorğularında iştirak edib və qalib olub. Məsələn:

* Azərbaycan Diasporla İş üzrə Dövlət Komitəsinə 39.925,3 manat dəyərində hədiyyələr və suvenirlər satılıb;
* Qəbələ rayon İcra Hakimiyyətinə 4.720 manat dəyərində lampa və elektrik malları təqdim edilib;
* Sumqayıt şəhər İcra Hakimiyyətinin Hacı Zeynalabdin qəsəbə nümayəndəliyinə 4.492,5 manatlıq təmir materialları və 9.392,8 manatlıq ofis malları satılıb;
* Ucar rayon İcra Hakimiyyətinə müxtəlif mallar üzrə ümumilikdə 45.546,58 manatlıq təchizat həyata keçirilib;
* Bakı Dövlət Peşə Təhsil Mərkəzinə 5.121,2 manatlıq müşahidə kameraları;
* Azərbaycan Texniki Universitetinə 22.470,74 manatlıq inventar və idman malları;
* Naxçıvan Yaşıllaşdırma Xidmətinə 8.578,6 manatlıq kompüter və printer avadanlıqları;
* Kənd Təsərrüfatı Nazirliyinin Bitki Mühafizə və Texniki Bitkilər Elmi Tədqiqat İnstitutuna 74.979,56 manatlıq mallar;
* Şəmkir rayon İcra Hakimiyyətinə isə 9.994,6 manatlıq maşın və avadanlıqlar satılıb.

Son iki ayda müxtəlif dövlət qurumlarının satınalma portalında yerləşdirilmiş məlumatlara əsasən, “Caucasian Supplies” MMC müxtəlif sahələr üzrə bir sıra dövlət sifarişlərini yerinə yetirib.

Qısa müddətdə fəaliyyətə başlamasına baxmayaraq, “Caucasian Supplies” MMC peşəkar kadr potensialı, güclü texniki bazası və geniş məhsul çeşidi ilə dövlət qurumlarına etibarlı təchizatçı kimi tanınmaqdadır. Şirkət müxtəlif sahələrdə keyfiyyətli xidmətləri ilə seçilərək, etibarlı tərəfdaş imicini möhkəmləndirib.