“Hər iki övladıma mənzil almışam. Bu o demək deyil ki, mən çamadanla pulu götürüb Nyu-Yorka apardım və mənzil aldım”.

Yenixeber.org: Bunu sabiq xarici işlər naziri Elmar Məmmədyarov Baku TV-də yayımlanan “Üzbəüz” verilişində qonaq olarkən 4,5 milyon dollarlıq mənzil alınması ilə bağlı sualı cavablandırarkən deyib.

O bildirib ki, mənzil alınması ilə bağlı Nyu-York banklarından biri ilə bir il təmasda olub: “O bank vasitəsilə mən danışıqlar aparmışam. Hər bir dolların hesabatı var, bankın mənə köçürmələrə icazə verdiyinə dair evdə beş kiloqram kağız var. Mənzilləri almışam, inanmıram ki, bu, pis hərəkətdir. Böyük oğlum mənimlə burada, kiçik oğlum isə Nyu-Yorkda yaşayır. Bir ata kimi gərək mən də övladlarıma mülk alım”.

Qeyd edək ki, Elmar Məmmədyarovun dediklərindən çətinliklə də olsa o anlaşılır ki, Bakıdan bankla Nyu-Yorkdakı hansısa banka pul köçürüb. Həmin pulla da, vergisini ödəyərək iki mənzil alıb. Bu zaman ABŞ bankının pulun mənşəyi ilə bağlı suallarına da cavab verib.

Ancaq sabiq nazir yenə də Azərbaycan ictimaiyyətinə 4,5 milyon dolları hardan əldə etdiyini açıqlamağa ehtiyac duymur. "Şəxsi işimdir"  deyərək ötüşdürməyə çalışır. Halbuki Elmar Məmmədyarov Nyu-Yorkda mənzilləri nazir işləyərkən aldığından xalqa bunun hesabatını verməyə BORCLUDUR! 

Əgər 4,5 milyon dolların mənşəyi ilə bağlı ABŞ bankına təqdim etdiyin sənədlər saxta deyilsə, açıqla 4, 5 milyonu hardan əldə etdiyini ictimaiyyət də bilsin!"Azpolitika"