AZ
RU
Xankəndidə konsert verən musiqiçilər "arzuolunmaz şəxslər” siyahısında
İşğal olunmuş ərazilərimizdə konsert verən təşkilat saytından UNESCO-nun loqosunu çıxarmağa məcbur olub
Ermənilər tərəfindən işğal edilmiş Azərbaycan ərazilərində fevralın 6-da konsert proqramı və “master-class”lar təşkil edən “Music for Peace” təşkilatı UNESCO-nun etirazından sonra saytında beynəlxalq təşkilatın loqosundan imtina etməyə məcbur olub.
"Xeberinfo.com": Məlumata görə, bu barədə APA-ya məlumat verən Azərbaycan XİN-in sözçüsü Hikmət Hacıyev qeyd edib ki, Azərbaycanın UNESCO yanındakı daimi nümayəndəliyi “Music for Peace” tərəfindən UNESCO-nun loqosunun hansı əsasla istifadə edilməsi məsələsini qaldırıb.
Azərbaycan tərəfinin sorğusuna cavab olaraq UNESCO katibliyindən bildirilib ki, bu təşkilatın UNESCO-nun loqosundan istifadə etməyə və ya özünü hər hansı bir formada UNESCO ilə əlaqələndirməyə heç bir əsası yoxdur. UNESCO-nun loqosundan qeyri-qanuni istifadə edən bu təşkilata UNESCO tərəfindən etiraz edilib və nəticə etibarilə “music-peace.com” saytından UNESCO-nun loqosu çıxarılıb.
H.Hacıyev bildirib ki, beynəlxalq hüququ və Azərbaycanın ərazi bütövlüyünü tanıyan UNESCO-nun adından və loqosundan istifadə edərək, bu cür fəaliyyət göstərmək yolverilməzdir: “Bu fakt özlüyündə Azərbaycan Respublikasının işğal edilmiş ərazilərində qanunsuz konsert proqramı təşkil edərək "sülh"ə xidmət etdiyini iddia edən, amma əslində işğal və təcavüzün nəticələrini təşviq edən bu qeyri-hökumət təşkilatının yalanının ifşasıdır”.
XİN rəsmisi əlavə edib ki, Azərbaycanın işğal edilmiş ərazisi olan Xankəndidə konsert verən musiqiçilərin adları Azərbaycanda “arzuolunmaz şəxslər” siyahısında daxil edilib.
Xatırladaq ki, təşkilatın rəsmi saytında yayımlanan afişada fortepiano ifaçısı Mariya Nemtsova və saksofon ifaçıları Vitali Vatul, Dmitri Uvarov, Yevgeni Novikov və Xuan Manuel Dominqesin adları qeyd olunub. Azərbaycan XİN-in etiraz bəyanatından sonra “Music for Peace” təşkilatının təsisçilərindən biri olan Mariya Nemtsova siyasətlə yox, musiqi ilə məşğul olduqlarını, Azərbaycanda konsert verə bilmədiklərinə görə təəssüfləndiyini bildirib.
(5).jpeg)
