Yenixeber.org: Bu fikirləri Rusiya büromuza açıqlamasında Moskvadakı Azərbaycan icmasının sədri Şamil Tağıyev deyib.“Erməni diasporuna, səfirliyinə və erməni lobbisinə xidmət edənlərə tutarlı cavab vermək lazımdır. Bunun üçün Lev Əsgərovu Moskvada mətbuat konfrası keçirmək üçün Rusiya paytaxtına dəvət etmək istəyirik”.

Onun sözlərinə görə, “Nezavisimaya qazeta”da dərc olunan məqalə dəlillər əsasında yazılıb və sübutu var: “Ermənistanın Rusiyadakı səfirliyinin hərəkətləri Rusiyada mətbuat azadlığına qarşı çıxmaq kimi qiymətləndirilir. Məqalədə keçmiş SSRİ-nin Dövlət Təhlükəsizlik Komitəsinin arxiv sənədləri yer alıb və məlumat tarixi faktlarla sübuta yetirilib”.

Ş.Tağıyev ermənipərəst qüvvələrin “Nezavisimaya qazeta” ilə mübarizəsini Rusiya cəmiyyətindən həqiqətləri gizlətmək olduğunu bildirib.

Xatırladaq ki, 1988-ci ilin Sumqayıt hadisələrinin ildönümü ərəfəsində “Nezavisimaya qazeta”da jurnalist Lev Əsgərovun “Sumqayıt faciəsi. Nədən başlayıb və necə olub” adlı məqaləsi dərc olunub. Bundan sonra Ermənistanın Rusiyadakı səfiri Vardan Toqanyan Rusiya Baş Prokurorluğuna müraciət edərək jurnalist L.Əsgərovun və redaksiyanın cəzalandırılmasını tələb edib. Rusiyada fəaliyyət göstərən Azərbaycan diaspor təşkilatları isə bu məsələnin araşdırılması üçün Rusiya Baş Prokurorluğuna müraciət ediblər.(report)