ABŞ prezidenti Donald Tramp hazırda Demokrat partiyasının nəzarət etdiyi Nümayəndələr palatasında impiçment prosedurunun başlanması ilə bağlı məsələyə toxunub.

Yenixeber.org:  Birləşmiş Ştatların dövlət başçısı həmin prosesin dayandırılması üçün hansısa hüquqi üsulların tapılmasının vacibliyindən danışıb. Ağ Evin rəhbərinin fikrincə, bu məhkəmə vasitəsilə də həyata keçirilə bilər.

“Demokratların bu ölkəyə etdikləri əsl rüsvayçılıqdır. Buna yol vermək olmaz. Bunu hansısa yolla, əgər imkan varsa, hüquqi vasitələrlə durdurmaq lazımdır”,- deyə Donald Tramp BMT Baş Assambleyasının növbəti sessiyasında işitrak etdiyi Nyu-Yorkdan dönüşündə, Vaşinqtonun “Endryus” hava bazasında jurnalistlərin suallarına cavab verərkən bildirib.

Amerika liderinin firkincə, administrasiyaya edilən hücumlar Demokrat partiyasının üzvlərini qanunvericilik prosesindən yayındırır. “Bu adamlar bizim ölkənin irəliləyişində əsl əyləc rolunu oynayırlar. Bunların ucbatından nə silahlara nəzarətdən, nə də ümumiyyətlə, heç bir şeydən danışa bilmirik”,-deyə D. Tramp qeyd edib.

ABŞ prezidenti demokratları “xaincə hücum edən quldurlar” adlandırmaqdan çəkinməyərək, müxalif qüvvəni seçkidə qalib gələ bilməyəcəyini anladığı üçün bu cür yollara əl atdığını deyib.

Daha sonra Donald Tramp prezidentliyi dövründəki “böyük xidmətlərindən” danışıb. Onun iddiasına görə, rəhbərlik etdiyi administrasiya 2 il yarım ərzində heç bir prezidentin əldə etmədiyi nailiyyətləri qazanıb. “Biz dünyanın ən yaxşı iqtisadiyyatına və ordusuna malikik”,-deyə prezident özünü öyməkdən yorulmayıb.