Pakistan baş naziri İmran Xan ölkənin hərbi qulluqçularına Hindistan tərəfdən gələ biləcək istənilən təcavüzə cavab verməyi əmr edib.

Yenixeber.org: Xarici agentliklər xəbər verir ki, bu barədə Pakistanın Təhlükəsizlik üzrə milli komitəsininin iclasının yekunu ilə bağlı baş nazirliyin dəftərxanasının yaydığı məlumatda deyilir.

Komitənin toplantısında rəsmi İslamabadın bu ilin fevralın 14-də Cammu və Kəşmir ştatlarında hərbçilərə qarşı törədilən terror aktı ilə bağlı heç bir şəkildə aidiyyəti olmadığı, həmin hadisənin Hindistan ərazisində fəaliyyət göstərən qruplar tərəfindən planlaşdırıldığı və icra olunduğu vurğulanıb.

Bundan başqa, Pakistan rəsmisi Nyu-Dehliyə hücumla əlaqədar birgə təhqiqatın aparılmasını, habelə terrorizmlə mübarizə problemləri üzrə dialoqun başlanılmasını təklif edib.

Xatırladaq ki, intiharçı terrorçu 2,5 minlik hərbi qüvvəni aparan avtokolonun yaxınlığında özünü partladaraq 45 insanın ölümünə səbəb olub. Buna görə məsuliyyəti “Caiş-e Muhammad” (Məhəmməd ordusu) adlı təşkilat öz üzərinə götürüb.

Həmin radikal və separatçı qrupun yuxarıda adları çəkilən ştatlaırn Hindistandan ayırılaraq Pakistana birləşmək uğrunda çıxış etdiyi bilinir.

Vəziyyətin ciddiliyi Donald Tramp tərəfindən tvitter hesabında göstərilib.

ABŞ prezidenti Hindistan və Pakistan arasındakı situasiyanın “təhlükəli” olduğunu və buna görə narahatlıq hissi keçirdiyini yazıb.

“Kəşmirdə nəsə baş verib... bu olduqca təhlükəli situasiyadır”,-deyə Trampın tvitter hesabında deyilir.(müsavat)