Ali məktəblərin Bakının mərkəzindən şəhərətrafı ərazilərə köçürülməsi reallaşmaq üzrədir.

"Xeberinfo.com": Məlumata görə, Bakı-2015 Avropa Oyunlarından sonra köçürülmə işlərinə start veriləcək. Məlumatlı mənbənin sözlərinə görə, layihənin reallaşması üçün lazımı infrastruktur yekunlaşmaq üzrədir: “İnfrastruktur tamamlanmaq üzrədir. Nəzərə alsaq ki, universitetlərin əksəriyyəti Xocəsən və Sulutəpə ərazilərində yerləşdirilməsi nəzərdə tutulur, “Avtovağzal” metro stansiyasının bu işdə böyük yardımçı olacağını proqnozlaşdıra bilərik. 2012-ci ildə keçmiş təhsli naziri Misir Mərdanov bu barədə bir neçə dəfə açıqlama versə də, işlər müəyyən səbəblərdən yubanmışdı. Bunun obyektiv və subyektiv səbəbləri var. Keçmiş nazir “2013-cü ildə müəllimlər və şagirdlər yeni surprizlə qarşılaşacaq” deməklə buna işarə edirdi. Lakin işlərin ardıcıllıqla aparılmaması buna mane oldu. Tələbələr nəinki 2013-cü ildə, hec 2014-cü ildə də surpriz şahidi olmadı”, - deyə mənbə bildirib. Xatırladaq ki, paytaxtda universitetlərin şəhərətrafı ərazilərə köçürülməsi hələ 2011-ci ildən gündəmdədir. Plana görə, Bakının mərkəzindəki ali təhsil müəssisələrinin paytaxtdan çıxarılması nəzərdə tutulub. Bu siyahıya Dövlət Tibb Universiteti, Pedaqoji Universitet, Texniki Universitet, Memarlıq və İnşaat Universiteti, İqtisad Universiteti və digərləri aiddir. Dövlət Neft Akademiyasının da köçürülməsi planda olsa da, yeri məlum deyil. İddialara görə, bəzi universitetlərin Qəbələyə köçürülməsi də müzakirə olunur. Bakının mərkəzində yalnız BDU-nun qalacağı bildirilir. Bu addımla Bakının yaşadığı dəhşətli sıxlıq və tıxacın aradan qaldırılacağı proqnozlaşdırılır.