1881-ci ildən indiyədək (136 il ərzində) Bakı və Abşeron yarımadasında sentyabrda havanın temperaturunun 35 dərəcədən 20 dərəcəyə enməsi müşahidə edilməyib

Yenixeber.org: Bunu Azərbaycan Milli Elmlər Akademiyasının (AMEA) Coğrafiya İnstitutunun direktor müavini, coğrafiya üzrə fəlsəfə doktoru Məhərrəm Həsənov deyib.

"Bakıda hidrometeorolji stansiya 1881-ci ildə tikilib. Həmin ildən indiyədək havanın belə kəskin dəyişməsi müşahidə edilməyib, hidrometeoroloji müşahidələrdə bu hal qeydə alınmayıb".

Hava şəraitinin belə kəskin dəyişməsinin çox az müşahidə olunduğunu deyən M.Həsənov qeyd edib ki, 1996, 2003-ci illərdə buna bənzər hallar olub. Həmin illərdə sentyabr ayı bu ilki kimi çox isti keçməsə də, yağıntılar qəfildən düşüb.

M.Həsənov Azərbaycanda yağıntıların daha çox oktyabr ayı ərzində düşdüyünü də xatırladıb: "Azərbaycanda oktyabr ayı həmişə qeyri-sabit hava şəraiti ilə müşahidə edilib. Oktyabr ayında Bakıda və Abşeron yarımadasında atmosfer yağıntılarının aylıq orta miqdarı təqribən 26-32 mm olur. Ancaq 2015-ci ildə Bakıda və Abşeron yarımadasında yağıntının miqdarı 76 mm-ə qədər artıb, yəni normadan 2 dəfədən çox yağıntı düşüb. Yəni yağıntının miqdarının normadan çox düşməsi halı Bakıda və Abşeron yarımadasında bəzi illərdə müşahidə edilib. Lakin indiyədək Bakıda yaydan payıza keçid bu dərəcədə kəskin olmayıb".

Qeyd edək ki, bu il hava qəfildən soyuyub. Sentyabrın son ongünlüyünün əvvəlinədək Bakıda və Abşeron yarımadasında 35 dərəcəyə kimi isti olub. Lakin sentyabrın 27-də havanın temperaturu 19-22 dərəcəyə enib.//Trend