Beşinci Zobucuq qəsəbəsinin sakinləri göstərilən qayğıya görə prezident İlham Əliyevə minnətdarlıqlarını bildirdilər

"Xeberinfo.com": Bu gün Füzuli rayonunun Beşinci Zobucuq qəsəbəsinə təbii qazın verilməsi münasibəti ilə tədbir keçirilmişdir. Tədbirdə rayonun idarə, müəssisə, hüquq mühafizə orqanlarının rəhbərləri, “Azəriqaz” İstehsalat Birliyinin və ictimaiyyətin nümayəndələri iştirak etmişlər.

Açılış mərasimində Füzuli rayon İcra Hakimiyyətinin başçısı Alı Alıyev çıxış etmiş, respublika əhalisinin təbii qaza olan təlabatını təmin etmək məqsədi ilə genişmiqyaslı işlər həyata keçirildiyini bildirmiş, uzun müddət təbii qaz almayan yaşayış massivlərinin “mavi yanacaq”la təmin olunduğunu vurğulamışdır.

Alı Alıyev qeyd etmişdir ki, rayonun yaşayış məntəqələrinin əksəriyyəti artıq təbii qazla təmin olunmuş, ilin sonunadək bütün yaşayış məntəqələrinə qaz çəklişi başa çatacaqdır.

Rayonda həyata keçirilən infrastruktur layihələri, o cümlədən kənd və qəsəbələrin qazlaşdırılması barədə məlumat verən Alı Alıyev qəsəbə sakinlərini əlamətdar gün münasibəti ilə təbrik etmişdir.

Qeyd edək ki, 400 abonenti olan qəsəbənin qazlaşdırılması məqsədilə birpilləli sistem əsasında 16263 kilometr uzunluğunda müxtəlif diametrli polad borularla daşıyıcı və məhəllədaxili qaz kəmərləri çəkilmiş, 400 ədəd sayğac və fərdi tənzimləyici quraşdırılmışdır.

Mərasimdə çıxış edən qəsəbə sakinləri göstərilən qayğıya görə ölkə Prezidenti İlham Əliyevə minnətdarlıqlarını bildirmişlər.

Sonra rəmzi məşəl yandırılmış və evlərə mavi yanacağın verilməsinə baxış keçirilmişdir.