Vidadi İsayev Heydər Əliyev Parkının tikintisini müəllim, həkim və fəhlələrin hesabına həyata keçirməyə başlayıb 

     "Xeberinfo.com": Bərdənin icra başçısı Vidadi İsayevlə bağlı yeni məlumatlar yayılıb. Məlumata görə, icra başçısı dövlət layihələrinin icrasını həyata keçirən zaman, büdcədən ayrılmış pulları təyinatı üzrə xərcləmədiyindən ciddi maddi sıxıntı yaşayır. 

      Məlumatda vurğulanır ki, İsayev həmin pulları öz şəxsi məqsədləri üçün sərf etdiyindən belə bir durum yaranır. Bunun da əsas ağırlığı büdcə təşkilatlarının işçilərinə düşür. JAM.AZ-a verilən məlumata görə, Bərdədə park tikintisi zamanı maliyyə çatışmazlığını aradan qaldırmaq üçün icra başçısı müəllim, həkim, idarə və müəssisə rəhbərləri və işçiləri daxil olmaqla hamısından iki aylıq maaşlarını yığdırıb. Yalnız müəllimlərə qismən "güzəşt" olunub ki, bu da onların maaşlarının 70-80 faizinin tutulmasından ibarətdir. 

     Məlumatda o da vurğulanır ki, bu il ilk dəfə fevral-mart aylarında maaşların yığılması prosesi keçirilib. Amma Vidadi İsayevin yenə maliyyə "problemi" yaranıb. O səbəbdən də artıq bütün idarə və müəssisə rəhbərlərinə tapşırıq gəlib ki, büdcə təşkilatlarında çalışan rayondakı bütün kontingentin iyun ayının əmək haqqısı 100 faiz tutularaq, İcra Hakimiyyətinin ixtiyarına verilməlidir. Səbən isə Bərdədə Heydər Əliyev Parkının inşa edilməsi zamanı pul çatışmazlığı göstərilir.