29 dekabr 2015-ci il tarixində Həştərxan şəhərində Dünya Azərbaycanlılarının Həmrəylik Gününə həsr olunmuş tədbir keçirilib.

Xeberinfo.com: Tədbirdə “Həştərxan Şəhər” administrasiyasının rəhbəri Oleq Polumordvinov, Beynəlxalq və Xarici İqtisadi Əlaqələr naziri Denis Afanasyev, Həştərxan vilayəti administrasiyasının Daxili siyasət İdarəsinin rəisi Vyaçeslav Vinoqradov, Həştərxan şəhəri administrasiyasının rəhbərinin müavini Qennadiy Didenko, ÜAK Həştərxan bölməsinin sədri, Həştərxan şəhərinin fəxri vətəndaşı Ədalət Hüseynov, vilayətin milli-mədəni ictimai təşkilatlarının rəhbərləri, Azərbaycan diasporasının nümayəndələri və AMOR-un üzvləri iştirak ediblər.

Tədbir iştirakçıları Azərbaycan xalqının ümummilli lideri Heydər Əliyevin onun adını daşıyan parkda ucaldılmış abidəsi önünə gül dəstələri qoyaraq Dünya Azərbaycanlılarının Həmrəylik Günü barədə məlumat veriblər. Qeyd olunub ki, bu tarix Ulu Öndər Heydər Əliyevin adı ilə bağlıdır. Məhz onun sərəncamı ilə 31 dekabr tarixi bütün Dünyada yaşayan azərbaycanlıların həmrəyliyi günü kimi qeyd olunur. Çıxış edənlər Heydər Əliyevin Azərbaycan xalqının mürəkkəb zamanlarda birləşərək çətinliklərin öhdəsindən gəlməsində əvəzsiz rolundan danışmışlar. Həmçinin Ulu Öndərin iki qonşu dövlət – Rusiya Federasiyası və Azərbaycan xalqları arasındakı dostluq münasibətlərinin inkişafı istiqamətində gördüyü işlər barədə də danışılıb.

Daha sonra tədbir təntənəli mərasim və şənliklə davam etmişdir.