"Qarabağ Universiteti ən müasir standartlara uyğun olaraq qurulur. Universitetin akademik məzmunu çox müasir formatda təşkil olunub. Professor-müəllim və inzibati heyət bu məzmunu tələbə gənclərə çatdırmaq üçün xüsusi həssaslıqla seçilib. Çox sevinirik ki, komandamız peşəkarlardan ibarətdir. Bu bizi əmin edir ki, Prezidentin tapşırığına uyğun olaraq Qarabağ Universiteti ən keyfiyyətli ali təhsil xidmətlərini göstərə biləcək bir ali təhsil müəssisəsi olacaq".

Yenixeber.org: Bu sözləri jurnalistlərə açıqlamasında Qarabağ Universitetinin rektoru Şahin Bayramov bildirib.

Rektor qeyd edib ki, Qarabağ Universitetinin hədəflərindən biri də tədqiqat əsaslı ali məktəb olmaqdır:

“Müvafiq istiqamətlər üzrə aparacağımız nəticə yönümlü tədqiqatlar sayəsində regionumuz, ölkəmiz üçün faydalı olacaq həllər təklif etməyi nəzərdə tuturuq. Qarabağ Universiteti tələbələri Heydər Əliyev ideyalarına sadiq gənclər olaraq yetişdirməyi nəzərdə tutur. Çalışacağıq ki, tələbələrimiz milli-mənəvi dəyərlərimizə sahib, müasir dünyagörüşlü gənclər olaraq yetişsinlər. Bütün bunları həyata keçirmək üçün müvafiq infrastrukturumuz, kadr potensialımız mövcuddur”.

Qeyd edək ki, Azərbaycan Respublikasının Prezidenti İlham Əliyev sentyabrın 20-də Xankəndi şəhərində Qarabağ Universitetinin təmirdən sonra açılışında iştirak edib.