Azərbaycanın sabiq Prezidentinin mətbuat katibi, “Yeni Nəsil” Jurnalistlər Birliyinin sədri Arif Əliyev ötən gün axşam saatlarında İctimai Televiziya və Radio Yayımları Şirkətinin (İTV) binasında baş verən yanğın hadisəsindən danışıb. 

Yenixeber.org: A.Əliyev saytımıza açıqlamasında sözügedən yanğın hadisəsinin təxribat olma ehtimalını istisna etməyib.

O bildirib ki, İTV-də yeni rəhbərlidən sonra bu televiziyanın efir məkanında müsbət dəyişikliklər müşahidə olunur:

"Bu müsbət dəyişikliklər Azərbaycan cəmiyyətində də geniş müzakirələrə səbəb olub və təqdir olunur. Ona görə də cəmiyyətimiz dünən İTV-nin binasında baş vermiş yanğınla bağlı ilkin olaraq təxribat olması iddialarını müzakirə edir. Onlar düşünürlər ki, İTV-nin efirindəki müsbət dəyişikliklərə bəzi qüvvələrin təpkiləri böyükdür. Ancaq şəxsən mənim fikirlərimə gəldikdə, belə bir məsələni iddia etmək üçün gərək əldə konkret əsaslarım olsun. Yəni düşünmürəm ki, İTV-dəki müsbət dəyişikliyi istəməyən qüvvələr bu şəkildə tətbiqə əl atsınlar. Amma istənilən halda bu televiziyanın qorunması ilə əlaqədar tədbirlər gücləndirlməlidir. Bu təkcə yanğınla bağlı deyil. Ümumiyyətlə, teleradio şirkətləri bu cür hallara qarşı hazırlıqlı olmalıdırlar. Lazımı qurumlar isə bu televiziyanın mühafizəsi işinə diqqəti artırmalıdırlar".(demokrat)

Zaur Hacılı