Abşeron rayonu Ceyranbatan qəsəbə idmançıları lazımı şəraitin olmamasından narazıdır 

       "Xeberinfo.com": Redaksiyamıza Ceyranbatan sakinləri və idmançıları tərəfindən, respublika Prezidenti cənab İlham Əliyevə ünvanlanmış müraciət daxil olub. Aktuallığını nəzərə alıb müraciəti olduğu kimi oxucularımızın da nəzərinə catdırırıq:

       Yazıb, sizə bildiririk ki, Abşeron rayonu Ceyranbatan qəsəbə gənclərinin və uşaqlarının asudə vaxtlarını səmərəli keçirmələri üçün heç bir şərait yoxdur. Əvvəllər qəsəbədəki 1 saylı məktəbdə uşaqların idmanla məşğul olmaları üçün kiçik də olsa bir yer ayrılmışdır. Bu yaxınlarda həmin kiçik zalda təmir üçün bağlandı.                                                       

      Hörmətli cənab prezidentimiz sizin gənclərə göstərdiyiniz diqqət və qayğı eyni  zamanda respublikamızda idmanın inkişafı sahəsində gördüyünüz əhatəli və geniş tədbirlər nəticəsində ölkəmiz çox ciddi uğurlara nail olmuşdu.                                        
     Təssüflər olsun ki, sakini olduğumuz Ceyranbatan qəsəbəsində 20 mindən artıq əhalinin yaşamasına baxmayaraq istedadlı uşaqların özlərini göstərməsi üçün qəsəbə rəhbərliyi tərəfindən heç bir tədbir görülmür. Bu boyda qəsəbəmizdə bir dənə də olsun idmana aid hər hansı bir kompleks yoxdur. Bu səbəbdən uşaqlarımız idmanla məşğul olmaq üçün Sumqayıt və Xırdalan kimi qəsəbədən xeyli uzaq məsafədə yerləşən şəhərlərə getməli olurlar. Bu məqsədlə də sizə müraciət etmək məcburiyyətində qaldıq. Xahiş edirik ki, uşaqlarımızın idman sahəsindəki bacarıq və qabiliyyətinin aşkarlanmasında müstəsna rolu olan hər hansı idman kompleksinin fəaliyyətə başlanması üçün rayon və qəsəbə rəhbərliyinə təsir göstərəsiniz.