AZ
RU
.png)
Müsavat AŞPA məruzəçilərilə görüşdən imtina edib!?
"xeberinfo.com": Bakıda səfərdə olan AŞPA Monitorinq Komitəsinin həmməruzəçiləri Cozef Debone Qrex və Pedro Aqramunt bir neçə siyasi partiyanın lideri və REAL hərəkatının təmsilçisi ilə görüşüb.
Görüşdə Xalq Cəbhəsi Partiyasının sədri Əli Kərimli, Demokrat Partiyasının sədri Sərdar Cəlaloğlu, Azad Demokratlar Partiyası təşkilat komitəsinin sədri Sülhəddin Əkbər və REAL hərəkatının icra katibi Natiq Cəfərli iştirak ediblər. Bəzi saytlarda xəbər yayılıb ki, Müsavat Partiyası dəvətli olsa da, görüşə qatılmaqdan imtina edib.
Müsavat Partiyasının mətbuat xidməti görüşə qatılmaqdan imtina etdikləri barədə yayılan xəbərin yanlış olduğunu bildirən açıqlama yayıb. Açıqlamada deyilir: “Mediada yayıla məlumatlardan məlum olub ki, Müsavat başqanı İsa Qəmbər bu gün Avropa Şurası Parlament Assambleyasının Monitorinq Komitəsinin həmməruzəçilərinin Azərbaycandakı bəzi müxalifət partiyalarının rəhbərləri ilə keçirdiyi görüşə dəvət edilməsinə baxmayaraq görüşə qatılmayıb.
Bildiririk ki, Avropa Şurasının Bakı ofisinin nümayəndələri ilə bugün dəqiqləşdirilmiş məlumata görə, görüşə dəvət haqqında məlumat Müsavat Partiyası başqanının keçmiş köməkçisi, hazırda partiyanın üzvü olmayan şəxsə verilib. Lakin məlumat partiya rəhbərliyinə çatdırılmayıb. Müsavat Partiyasının rəhbərliyi həmin görüşdə məhz bu səbəbdən – yəni görüşə dəvət barədə məlumat verilmədiyindən iştirak etməyib. Müsavat Partiyası rəhbərliyinə olan dəvətlərin Müsavat Partiyası başqanının qəbul otağına – 012 447 46 56 saylı telefonla bildirilməsi məqsədəuyğundur”.
