Vüqar İskəndərov: “Korrupsiya və rüşvətlə məşğul olmanın əxlaqsızlıq olduğu cəmiyyətə aşılanmalı, belə əməllərə yol verənlər əxlaqsız biri kimi tanınmalıdır” 

"Müharibə hələ də davam edir. Cəbhədə silahlar sussa da, daha kəskin formada diplomatik müharibə davam edir...” 

“Prezidentin siyasi və diplomatik məharəti özünü onda göstərir ki, iri dövlətlərin maraqlarının Azərbaycanın milli maraqları ilə uzlaşması təmin edilir” 

Yenixeber.org:İctimai marağı kəsb edən məsələrlə bağlı millət vəkili, Yeni Azərbaycan Partiyası Təftiş Komissiyasının üzvü Vüqar İskəndərovun müsahibəsini təqdim edirik:

-Vüqar müəllim, ilk olaraq parlamentin yeni tərkibinin gözləntiləri doğrultmadığına dair fikirlərlə sizin münasibətinizi öyrənmək istərdim. Yəqin, bilirsiniz ki, ictimaiyyət arasında Milli Məclisin yeni tərkibi ilə bağlı birmənalı fikir yoxdur. Hətta bir müddət əvvəl parlamentin buraxılacağı da kifayət qədər ciddi müzakirə mövzusuna çevrilmişdi. Siz də növbədənkənar seçkilərdə ilk dəfə mandat alan gənc deputatlardansınız. Bu fikirləri nə dərəcədə haqlı sayırsınız?

-Əvvəla, saytınızın rəhbərliyinə və kollektivinə müsahibə üçün təşəkkürümü bildirirəm. Fürsətdən istifadə edib Zəfər Bayramı münasibətilə bütün xalqımızı təbrik edir, Şəhidlərimizə Allahdan rəhmət, qazilərimizə şəfalar diləyirəm. Sualınızla bağlı isə onu bildirim ki, parlament də cəmiyyətimizin bir hissəsidir. Bura seçilmiş insanlar başqa bir ölkədən, kənar planetdən gəlməyiblər. Hər bir sahədə olduğu kimi, parlamentin təkibində də müxtəlif keyfiyyətdə insanların olması təbiidir. Bundan əvvəlki dövrlərdə olduğu kimi, indiki parlamentin tərkibində də fəallığı ilə seçilən millət vəkilləri də var, passiv deputatlar da. Əlbəttə ki, indiki parlament əvvəlkilərdən gənclərin sayının çox olması ilə fərqlənir.

Bundan əvvəlki çağırışlarda yaşı 35-dən aşağı bir-iki deputat olardı. İndiki Milli Məclisdə isə bu yaşda 10-dan artıq deputat saymaq olar. Bu da dövlətimizin, cəmiyyətimizin gənclərə etimadını göstərir. Deyim ki, gənc deputatların əksəriyyəti bu etimadı doğrultmağa çalışır. Sözsüz ki, yeni seçilmiş deputatlardan bir neçə çağırış parlamentinin üzvü olan, medianın, ictimaiyyətin yaxşı tanıdığı bəzi millət vəkillərinin fəallığını, onlar kimi qanunları şərh etməsini gözləmək doğru olmaz. Bu adamlar parlament məktəbini keçmiş insanlardır, gənc deputatlar isə bu məktəbin yeni tələbələridir.

Ancaq razıyam ki, parlament heç də orta məktəb deyil, qanunvericiliyi formalaşdıran siyasi orqandır. Millət vəkilləri daim cəmiyyətin diqqət mərkəzində olan insanlardır. Onlarla bağlı hər məsələ ictimai müzakirəyə çevrilir. Ona görə də deputat seçilmisənsə, gərək qısa müddətdə parlamentar fəaliyyətə adaptasiya olunub aktiv şəkildə üzərinə düşən vəzifələri yerinə yetirəsən. İctimai-siyasi həyatda fəal olasan, deputat kimi məsuliyyətini anlayıb ona görə addımlarını atasan. Yəni, deputat olmaq qaynar ictimai-siyasi həyatın içərisinə atılmaqdır. Kənarda qalmaq olmaz. Bu baxımdan ictimaiyyətin yeni seçilən deputatlardan gözləntilərinin yüksək olması başadüşüləndir. Əvvəlki çağırışlardakı millət vəkilləri üzərində bu qədər ictimai nəzarət olmayıb. Bu da çox yaxşı haldır və millət vəkillərini daha fəal olmağa sövq edir. Həmkarlarımın əksəriyyəti, o cümlədən yeni seçilmiş gənc deputatların bir çoxu bu tələbi qarşılamağa çalışır.

Düzdür, indiki parlament formalaşdıqdan az sonra bütün dünyada olduğu kimi Azərbaycanda da pandemiyanın təsiri nəticəsində hər yer qapadıldı. Parlamentin komitə iclasları da bir müddət onlayn şəkildə keçirildi. Bu, deputatların aktiv fəaliyyətinə müəyyən maneələr yaratdı. Ancaq hətta həmin dövrdə belə biz televiziyalar, saytlar vasitəsilə cəmiyyəti maraqlandıran məsələlər barədə, ictimaiyyətin maarifləndirilməsi istiqamətində səylərimizi davam etdirir, seçicilərimizlə görüşlər keçirirdik. Vətən müharibəsi zamanı və ondan sonrakı dövrdə deputatlarımızın əksəriyyətinin, xüsusən gənc millət vəkillərinin ictimai-siyasi həyatda daha fəal olduğunu görə bilərik. Bu gün əvvəlki illərdən fərqli olaraq millət vəkillərimizin bir çoxu hər telekanalda keçirilən siyasi tok-şoulara qatılır, mediada yazılarla çıxış edir, tədbirlərə qatılır, seçicilərilə tez-tez ya birbaşa, ya da onlayn görüşlər keçirirlər.

Qeyd edim ki, parlamentdə yeni bir şöbənin - icra hakimiyyətləri ilə iş şöbəsi yaradılması da deputatların məsuliyyətini artırıb. Bu şöbə hətta passiv deputatları belə seçicilərilə işləməyə, onların problemlərini öyrənməyə sövq edir. Eyni zamanda Prezidentin Administrasiyasında yaradılmış və hörmətli Ədalət müəllimin rəhbərlik etdiyi Siyasi partiyalar və qanunvericilik hakimiyyəti ilə əlaqələr şöbəsinin də fəaliyyət istiqamətlərindən biri millət vəkillərinin qaldırdığı problemlərin həllinə nail olmaqdır. Bu da bizdən fəal olmağı, təmsil etdiyimiz bölgələrdə əhalini narahat edən problemləri öyrənməyi tələb edir. Bu baxımdan indiki deputatların fəal olmadığına dair fikirləri obyektiv hesab etmirəm. İstisnalar var, amma bunu bütövlükdə parlamentə aid etmək doğru deyil.

-Əlbəttə, bütün deputatların passiv olduğunu və ya əksini iddia etmək olmaz. Ancaq cəmiyyət bəzən kritik situasiyalarda, lazım olan vaxtlarda millət vəkillərindən gözlənilən fəaliyyəti görmür. Məsələn, Vətən müharibəsi zamanı Azərbaycana qarşı həm Qərbdən, həm Rusiyadan, həm də İrandan başlanan total informasiya müharibəsində onların qarşılarında biz, əsasən, ölkə Prezidentini və qismən bir neçə şəxsi görürdük. Millət vəkillərinin, hökumət üzvlərinin bu savaşda iştirakı görünmürdü...

-İlk növbədə qeyd edim ki, Vətən müharibəsi zamanı və ondan sonrakı dövrdə cənab Prezident İlham Əliyevin apardığı geniş miqyaslı işləri, həm ölkə daxilindəki, həm də beynəlxalq arenadaki fəaliyyətini heç nə ilə, heç kimlə müqayisə etmək mümkün deyil. Cənab Prezident müharibə dövrü həm Ali Baş Komandan kimi orduya komandanlıq edir, həm ölkə rəhbəri kimi dövlət idarəçiliyini həyata keçirir, həm də beynəlxalq arenada diplomatik savaşda iştirak edirdi. Hər birini də ən yüksək səviyyədə. Müharibə dövrü dünyanın aparıcı media quruluşları vasitəsilə Azərbaycanın haqq işini ləkələmək, ölkəmizi informasiya blokadasına almaq cəhdləri hörmətli Prezidentimiz tərəfindən darmadağın edildi. Dövlət başçımız böyük siyasətçilərə xas ustalıqla ermənilərin və onların himayədarlarının beynəlxalq ictimai rəyi Azərbaycanın əleyhinə yönəltmək cəhdlərinin qarşısını aldı. Prezident təxribat xarakterli sualları belə soyuqqanlı şəkildə, elə ustalıqla cavablandırırdı ki, qarşısındakını, obrazlı desək, sadəcə mat edirdi.

Ancaq onunla da razı deyiləm ki, Vətən müharibəsi zamanı və ondan sonrakı dövrdə deputatlar aktiv fəaliyyət göstərməyiblər. Şəxsən mənim Vətən müharibəsinin davam etdiyi 44 gün ərzində Azərbaycan və Türkiyə mediasında, saytlarda 200-dən artıq yazım, telekanallarında çıxışlarım olub. Eyni şəkildə digər deputatlarımız da Azərbaycanın haqlı mövqeyini dünya ictimaiyyətinə çatdırmaq üçün fəal çalışıblar. Spiker başda olmaqla, bütün deputatlar dövlətimizin maraqlarını qorumaq istiqamətində bütün gücü ilə çalışıb. Deputatların hər biri hansı ölkə ilə parlamentlərarası dostluq işci qrupundadırsa, o ölkədə Azərbaycanın haqlı mövqeyinin çatdırılması üçün əlindən gələni edib.

-Vüqar müəllim, Vətən müharibəsinin başa çatmasından artıq bir il keçir. Sabah (bu gün-red) Zəfər Gününü qeyd edəcəyik. Necə bilirsiz, ötən bir ildə regionda yaranmış yeni situasiyanın Azərbaycanın maraqlarına tam cavab verdiyini demək olarmı?

-Bilirsiz, insan bəzən içərisində olduğu, yaşadığı hadisələrin əhəmiyyətini dərindən dərk edə, qiymətləndirə bilmir. Bir qədər müddət lazım olur ki, nə yaşandığını, hansı tarixi hadisənin iştirakçısı və ya şahidi olduğunu görə bilsin. Bizim də çoxumuz müəyyən müddət yaşadığımız tarixi hadisənin əhəmiyyətini dərk edə, daha doğrusu, bunun baş verdiyinə inana bilmədik. Müharibədən 2-3 ay, hətta bir həftə qabaq Azərbaycanın qısa müddətdə belə bir böyük zəfər əldə edəcəyini heç kim ehtimal belə etmirdi. Yalnız populist adamlar iddia edə bilər ki, mən bunu bilirdim. Əlbəttə, ölkə Prezidentinin rəhbərliyi ilə buna hazırlıq gedirdi. İstər ordu quruculuğu istiqamətində, istərsə də, diplomatik cəbhədə. Ancaq bu, cəmi 44 gün ərzində ərazilərimizi işğaldan azad edib, düşməni kapitulyasiyaya məhkum edəciyimizi proqnozlaşdırmırdı.

Bu baxımdan qazandığımız qələbənin əhəmiyyətini, necə deyərlər, isti-isti lazımınca qiymətləndirə bilmədiyimizi düşünürəm. Digər tərəfdən, belə böyük bir qələbənin qazanılması bizi, deyərdim, başqa, daha iddialı bir millətə çevirdi. Xalqımız keçmişdə yaşanmış ağır facilələrin, soyqırımların, məğlubiyyətin təsiri altında formalaşmış komplekslərdən çıxaraq öz gücünə olan inamını bərpa etdi, yenidən məğrur və qürurlu bir millətə çevrildi. Fikrimcə, bu, torpaqlarımızı işğaldan azad etməyimiz qədər əhəmiyyətlidir. Millətimiz uzun illərdən sonra hansı siyasi mövqeyi tutmasından asılı olmayaraq Ali Baş Komandanın siyasətinin ətrafında bir yumruq kimi birləşdi. Hər kəs dövlətinin yanında yer almaq üçün nəsə etməyə çalışırdı. Yadınızdadırsa, Şəkidə bir ağsaqqal kişi ayaqqabısı yırtıq olduğu halda təqaüdünü orduya keçirməyə gəlmişdi. Bu millətin dövlətinin yanında yer aldığına bariz nümunədir. Məhz bu cür birlik, Ali Baş Komandanın qətiyyətli, düşünülmüş siyasəti və ordumuzun şücaəti bizi əsrlər boyu həsrətində oldumuz Zəfəri qazanmağımıza gətirib çıxardı. Tarixçilər dəqiq bilər, biz təxminən 300 ildir, torpaqlarımızı itirə-itirə gəlirdik. Ona görə də bəzi qüvvələr bizim ərazilərimizi geri qaytarmağımızla bu gün də barışmaq istəmirlər. Ancaq kimin nə düşünməsindən, nə istəməsindən asılı olmayaraq Azərbaycan yeni reallıqlar yaradıb. Və düşünürəm ki, regionda yaranmiş yeni situasiya Azərbaycanın maraqlarına tam cavab verir.

Əlbəttə, daha yaxşı ola biləcəyini, yarımçıq qalan bəzi məsələlərin indiyədək həll edilməli olduğunu deyənlər var. Bu da təbiidir, hər kəs eyni fikirdə ola bilməz. Düzdür, bəziləri qərəzli şəkildə, qaraguruh mövqeyindən çıxış edərək müharibə bitibsə, dərhal bu məsələlər də həll olunmalıdır deyir. İstəyirlər, tarixi qələbəmizə kölgə salsınlar, ölkədə süni narazılıq yaratsınlar. Ancaq reallıqlar var, beynəlxalq güclərin, iri dövlətlərin regionda maraqları var və dövlət bütün bunları da nəzərə almaq məcburiyyətindədir. Azərbaycan dövlətinin Prezidentinin siyasi və diplomatik məharəti özünü onda göstərir ki, bu dövlətlərin maraqlarının Azərbaycanın milli maraqları ilə uzlaşmasını təmin edir. Nəhayətdə də Azərbaycanın milli maraqlarına cavab verən qərarların alınmasına nail olunur. Bu gün əgər Rusiya da, ABŞ da, Qərb ölkələri də, İran da Azərbaycanın regionda yaratdığı yeni reallıqla barışırsa, bu, uzun illər ərzində aparılan, hazırda da davam etdirilən böyük diplomatik işin nəticəsidir.

Ümumiyyətlə, ordumuzun, igid övladlarımızın Qarabağda, cəbhədə göstərdiyi qəhrəmanlıqlar, cənab Prezidentin isə diplomatik cəbhədə, xarici siyasətdəki uğurlu gedişləri nəticəsində regionda Azərbaycanın maraqlarına cavab verən yeni vəziyyət yaranıb. Yaxın gələcəkdə bunu daha aydın görəcəyik. Dövlətimiz bütün məsələləri nəzarətdə saxlayır, ən qısa müddətdə həllinə çalışır. Bu da heç də asan bir məsələ deyil. Ona görə də mən deyərdim, müharibə hələ də davam edir. Cəbhədə silahlar sussa da, daha kəskin formada diplomatik müharibə davam edir. Cənab Prezidentin bu müharibəni də qələbə ilə, Azərbaycan dövlətinin maraqlarına uyğun başa çatdıracağına şübhə etmirəm.

-Qeyd etdiniz ki, Rusiya da, Qərb ölkələri də, İran da Azərbaycanın regionda yaratdığı yeni reallıqlarla barışır. Ancaq İranın açıq şəkildə Azərbaycan dövlətinin suverenliyinə hörmətsizlik etdiyini, milli maraqlarımıza zidd siyasət həyata keçirdiyini müşahidə etdik. Rusiya sülhməramlılarının Qarabağdakı qanunsuz fəaliyyəti də ciddi narazılıqlar yaradır. Bu halda necə deyə bilərik ki, bu dövlətlər də Azərbaycanın regionda yaratdığı yeni reallıqlarla barışır?

-Əlbəttə, hər bir dövlətin özünün maraqları, milli strategiyası var. İstənilən ölkə yeni bir vəziyyət yarandıqda öz maraqlarını maksimum yüksək səviyyədə təmin etməyə çalışır. Bu, təbiidir. Ancaq beynəlxalq hüquqa, dostluq, qonşuluq haqlarına hörmət edən dövlətlər bu zaman başqalarının suverenliyinə müdaxilə etmir. Çox təəssüf ki, qonşu İran dövlətinə rəhbərlik edənlərin siyasətində biz bunun əksini görürdük. Bununla bağlı mən sizin saytınızda yazı ilə də çıxış etmişdim. Biz İranın regionda öz marağının olduğunu başa düşürük. Regiondakı yeni reallıqlardan niyə narahat olduğunu da təxmin etmək çətin deyil. Tehranın baxış bucağından yanaşdıqda, İranın niyə belə destruktiv mövqe tutmasını müəyyən edə bilərik. Mən təxminən 15-dən artıq şərt saya bilərəm. Tehranın məlum biznes maraqlarına zərbə dəymiş, sərhədində güclü bir dövlətin olduğunu anlamış və sair. Ancaq bunların heç biri İrana Azərbaycan dövlətinin suverenliyinə hörmətsizlik etmək, icazəmiz olmadan Qarabağa girib-çıxmaq haqqı vermir. Bunun da cavabı ən yüksək səviyyədə verildi. Azərbaycanın sərt reaksiyasını və gücünü gördü. Prezident açıq mətnlə İrana bu cür siyasətin qəbuledilməz olduğu mesajını verdi. Və biz görürük ki, bu mesaj ünvanına çatıb. Artıq İran öz şirkətlərinə Azərbaycan dövlətinin icazəsi olmadan Qarabağa girməyi qadağan edib. Yəni, İran bir müddət onun iştirakı olmadan regionda vəziyyətin dəyişməsini qəbul etmək istəməsə də, əvvəlki qaydalarla “yaşamağa” cəhd etsə də, sonda bununla barışmalı oldu. Son günlər gərginliyin aradan qalxdığını, İran və Azərbaycan arasında dostluq münasibətlərinin bərpa edildiyini müşahidə edirik. İki ölkənin rəsmiləri, XİN rəhbərləri mütəmadi əlaqə saxlayır, dostluq münasibətlərinin daha da inkişaf etdiriləcəyi mesajlarını verirlər. Azərbaycanın istədiyi də budur. Biz hər zaman İranın suverenliyinə hörmətlə yanaşmışıq, Tehrandan da bunu gözləyirik.

Rusiyanın mövqeyinə, xüsusən, sülhməramlıların Qarabağdakı fəaliyyətinə gəldikdə isə buna da təbii yanaşmaq lazımdır. Rusiya iki yüz ildən artıqdır Qafqazdadır və burada öz maraqlarını qorumaq üçün müxtəlif vasitələrdən istifadə edir. Bu gün Moskva regionda qalmaq və güclənmək niyyətlərindən əl çəkməyib. Bu bizim istəyimizdən asılı olan məsələ deyil. Dövlətin siyasətinin gücü ondadır ki, regionda təsiri olan dövlətlərin maraqlarını öz maraqları ilə uzlaşdırsın. Azərbaycan dövləti, Prezidenti də məhz bunu reallaşdıra bildi. Hamı bir zamanlar deyirdi ki, Azərbaycan torpaqlarını azad etmək üçün müharibəyə başlasa, qarşısında Rusiyanı görəcək. Ancaq bu baş vermədi. Niyə? Əlbəttə ki, Azərbaycan hakimiyyətinin, xüsusən, Prezidentin həyata keçirdiyi siyasət nəticəsində. Yəni, Azərbaycan dövləti elə bir incə siyasət aparır ki, həm özünün milli maraqlarını reallaşdırır, istədiyini alır, ancaq regionda maraqları olan dövlətlər də buradan uduşsuz çıxmır. Zəngəzur dəhlizi ideyası da məhz regiondakı bütün dövlətlərin maraqlarını təmin edəcək bir layihədir. Tək Azərbaycanın istəyi ilə, Rusiyanın marağı olmadan bunu reallaşdırmaq mümkün olarmı? Əlbəttə, olmaz. Və yaxud altılıq formatında yeni əməkdaşlığın qurulması. Bu cür əməkdaşlıqlar regionda sülhün yaranmasına və bir müddət sonra sülhməramlıların mövcudluğuna ehtiyac qalmamasına gətirib çıxaracaq. Yəni, zamanla bu gün problem kimi görünən məsələlər də həllini tapacaq. Əsas odur ki, Azərbaycan regionda yeni geosiyasi reallıqları yaradıb. Region dövlətləri də öz siyasətini bu geosiyasi reallıqlara uyğun qurmaq məcburiyyətindədir.

-Regiondakı yeni geosiyasi reallığın yaranmasında Türkiyənin rolunu, Azərbaycana dəstəyini necə qiymətləndirirsiniz?

-Əlbəttə, Türkiyənin rolunu, Azərbaycana dəstəyini xüsusi qeyd etmək lazımdır. Türkiyə özünün qardaşlığını, dostluğunu həm müharibə zamanı, həm də ondan sonrakı dövrdə çox yüksək səviyyədə göstərdi. Regiondakı yeni geosiyasi reallıq da məhz Türkiyənin sözdə deyil, əməldə Azərbaycanın yanında yer alması nəticəsində meydana çıxdı. Bilirsiniz, müharibənin başladığı ilk günlərdə başda Fransa olmaqla, bir sıra Qərb dövlətlərindən Azərbaycana qarşı təhdidlər gəlirdi. Bizdən öz torpağımızı müdafiə etməmək tələb olunurdu. Həmin vaxt Türkiyə gur səslə Azərbaycanın tək olmadığını bütün dünyaya bəyan etdi. Türkiyə Prezidenti Rəcəb Tayyib Ərdoğan Azərbaycanın yanında olduqlarını, münaqişəyə kənar müdaxilə olarsa, qarşılarında Türkiyəni görəcəklərini bildirdi. Cənab Prezidentin də qeyd etdiyi kimi, bu hamıya bir mesaj oldu. Eyni zamanda bizə əlavə güc verdi. Tək olmadığımızı hiss etdik. Bildik və gördük ki, əgər kimlərsə müdaxiləyə cəhd edərsə, Türkiyə sahədə Azərbaycanı müdafiə etməkdən çəkinməyəcək. Müharibənin davam etdiyi o gün olmadı ki, Türkiyənin Prezidenti, Xarici İşlər naziri, Müdafiə naziri, nazirlər, siyasi partiya rəhbərləri Azərbaycanı dəstəkləyən bəyanatlar verməsin. Hər gün Türkiyədən Bakıya yüksək tərkibli nümayəndə heyətləri gəlirdi. Yəni, Ankara saatlarını Bakı vaxtı ilə qurmuşdu. Ümumiyyətlə, Türkiyə və Azərbaycan arasında yaranmış dostluq, qardaşlıq münasibətləri ən yüksək səviyyədədir. Şuşa Bəyannaməsi bunun bariz göstəricisidir. Bu bəyannamə ilə Türkiyə və Azərbaycan münasibətləri tarixdə ən yüksək səviyyəyə çatıb. Şübhəsiz ki, bundan sonra da inkişaf edəcək. Çünki biz Ümumilli lider Heydər Əliyevin dediyi kimi iki dövlət bir millətik. Və heç zaman Qarabağın işğaldan azad olunmasında Türkiyənin rolunun həlledici əhəmiyyət daşıyan amillərdən biri olduğunu unutmayacağıq

-Vüqar müəlim, bir neçə sual da əhalini narahat edən sosial problemlərlə bağlı vermək istərdim. Son vaxtlar ard-arda baş verən qiymət artımları əhalidə ciddi narahatlıq yaradıb. Əvvəlcə, Tarif Şurası tərəfindən enerji daşıyıcılarının qiymətlərinin artırılması, sonra vergi və rüsumların qaldırılması ölkədə bahalaşmaya və sosial narazılıqlara səbəb olur. Bununla bağlı Sizin mövqeyiniz necədir?

-Əlbəttə, bu məsələlərlə bağlı iqtisadiyyatla daha yaxından məşğul olan deputatlarımız, ekspertlərimiz daha dəqiq fikir bildirə bilərlər. Yəni, bu cür artımlara niyə gedildiyini, getməməyin mümkün olub-olmadığını konkret rəqəmlərlə izah edə bilərlər. Təbii ki, qiymət artımına müsbət bir hadisə kimi yanaşmaq mümkün deyil. Həqiqətən də, bahalaşma var və hər bir şəxs kimi mən də bunu hiss edirəm. Ancaq onu da bilirəm ki, heç bir hökumət zərurət olmadığı halda hansısa sahədə qiymətləri qaldırmaq kimi qeyri-populyar addımı atmaz. Dediyiniz enerji daşıyıcılarının qiymətlərinin artırılması ilə bağlı əsaslı şəkildə izahat verilib və buna əlavə nəsə şərh verməyə lüzum görmürəm. Vergi və rüsumlarda da elə ciddi artımlar proqnozlaşdırılmır. Lakin bundan istifadə edən işbazların, ayrı-ayrı inhisarçı şirkətlərin qiymətləri süni şəkildə qaldırdığı da faktdır. Bir həftə 50 manat başa gələn bazarlığa bu gün 60 manat, növbəti həftə 65 manat xərcləməli olursan. Müvafiq dövlət qurumları, nazirliklər bu məsələni nəzarətə götürməli, əsassız qiymət artımlarının qarşısı sərt tədbirlərə alınmalıdır. Bu zaman Türkiyənin təcrübəsindən istifadə etmək, şəbəkə marketlərdə, topdansatış mərkəzlərində vaxtaşırı yoxlamalar həyata keçirərək qiymətlərin əsassız qaldırılmasının qarşısını almaq olar. Eyni zamanda daxildə yerli istehsalın miqyasını və həcmini artırmaqla idxalın yaratdığı bahalaşmanın qarşısını almaq mümkündür. Məsələn, xammal bizdə olduğu halda niyə 95 - “ Premimum” markalı benzini biz xaricdən baha qiymətə almalıyıq? Bu məhsulun istehsalı niyə ölkə daxilində təşkil edilmir? Yəni, bu cür məsələlərə diqqət edilməlidir. Xüsusən, gündəlik tələbat mallarının qiymətindəki dəyişikliklərə həssas yanaşılmalıdır. Cənab Prezident də hər zaman bunu diqqətdə saxlamağı tapşırır. Məhz Prezidentin tapşırığı ilə aztəminatlı əhalinin sosial müdafiəsini gücləndirmək məqsədilə hökumət gələn il əməkhaqqlarını, pensiya və müavinətləri qaldırmağı planlaşdırır. Təkcə minimum əmək haqqının 250 manatdan 300 manata qaldırılması 700 minə yaxın insanın əməkhaqqının artmasına səbəb olacaq. Bundan əlavə digər kateqoriyalardan olan insanların, xüsusən, Şəhid ailələrinin, qazilərin sosial vəziyyətinin yaxşılaşdırılması istiqamətində əhəmiyyətli addımlar atılacaq.

-Mümkündür mü ki, qiymətləri oliqarxlar əhalini hökumətdən narazı salmaq üçün qəsdən qaldırırlar?

-Bununla bağlı məlumatım olmadığımdan nəsə deyə bilmərəm. Ancaq belə bir fakt varsa, bu artıq dövlətə xəyanətdir. Bu adamlar vətən xainidir. Düşünürəm ki, ümumiyyətlə, dövlətin siyasətini hansısa sahədə - istər siyasi, istər hərbi, istərsə də, iqtisadi sahədə sabotaj edən varsa, onların adları açıqlanmalı və dövlətə xəyanət ittihamı ilə məsuliyyətə cəlb edilməlidir...

-Kifayət qədər yüksək vəzifəli şəxsin korrupsiya ilə məşğul olduğu və, beləliklə, dövlətin əsaslarını sarsıtdığı ortaya çıxır. Məgər bu, dövlətə xəyanət deyil? Bu adamların azadlıqda gəzməsi, həbs olunsa belə qısa müddət sonra azadlığa buraxılması ədalətə və dövlətə olan inamı sarsıtmır?

-Tamamilə razıyam. Korrupsiya dövləti, dövlətçiliyi içəridən yeyib dağıdan ən böyük bəlalardan biridir. Bununla ən ciddi şəkildə mübarizə aparılmalıdır. Dünyanın elə bir ölkəsi yoxdur ki, korrupsiya olmasın. Haradasa az, haradasa çox. Düşünürəm ki, bizim cəmiyyətdə korrupsiyanı yaradan əsas amillərdən biri də hələ sovet dövrü formalaşmış həyat tərzimiz, cah-cəlala, göstərişə meyilli olmağımızdır. Dünyanın inkişaf etmiş, həyat səviyyəsi yüksək olan ölkələrinin heç birində bizim qədər cah-cəlala meyl etmir, 3-4 mərtəbəli evlər tikdirməyə, toyuna 100-lərlə adam çağırıb, hər cür neməti stola düzməyə, ən çox yanacaq işlədən avtomobilləri almağa, bu qədər cehiz verməyə, evini ən bahalı əşyalarla bəzməyə və sairə cəhd etmir. Belə lazımsız, ancaq bizim üçün zərurətə çevrilən xərcləri ödəmək üçün pul tapmaq lazımdır. Belə dəbdəbəyə meyillilik bir çox insanı əxlaqsız yola - korrupsiyaya, rüşvətə meyilləndirir. Yəni, korrupsiya və rüşvətin kökünü kəsmək üçün ilk növbədə düşüncənimizi dəyişməli, daha sadə yaşamağı öyrənməliyik. Əlbəttə, hüquq-mühafizə orqanları da belə insanlara qarşı mübarizəni gücləndirməli, daha sərt cəzalar təyin edilməlidir. Cənab Prezident dəfələrlə bildirib ki, korrupsiya və rüşvətə qurşananlara qarşı güzəştsiz mövqe tutulmalıdır. Son illər istənilən ranqlı məmurun, nazir, nazir müavini olan şəxslərin məsuliyyətə cəlb edilməsi də bununla bağlı siyasi iradəni göstərir. Ancaq fikrimcə, yalnız sərt cəza tədbirləri ilə korrupsiya və rüşvətin qarşısını almaq mümkün deyil. Bunun üçün xüsusən yeniyetmələr, gənclər arasında geniş təbliğat, maarifləndirmə işləri aparmalı, korrupsiya və rüşvətlə məşğul olmanın əxlaqsızlıq olduğu cəmiyyətə aşılanmalıdır. Yəni insanlar yalnız qorxaraq deyil, əxlaqsız biri kimi tanınmamaq üçün korrupsiya və rüşvətdən qaçmalıdırlar.

-Vüqar müəllim, Siz YAP-ın Təftiş Komissiyasının üzvüsünüz, hakim partiyanın rəhbərliyində təmsil olunursunuz. Son illər iqtidarla müxalifət arasında siyasi dialoq mühitinin formalaşdırılması istiqamətində müəyyən addımlar atıldı. Bu, davam etdiriləcəkmi?

-Bəli, bu istiqamətdə də ciddi işlər görülür. Cənab Prezidentin tapşırığı ilə Prezidentin Administrasiyasında yaradılmış Siyasi partiyalar və qanunvericilik hakimiyyəti ilə əlaqələr şöbəsinin rəhbəri kimi hörmətli Ədalət müəllim bir-iki partiya istisna olmaqla, qalan bütün siyasi təşkilatların rəhbərlərilə görüşüb. Özlərini bu prosesdən kənarda saxlayanları mən hakimiyyətə deyil, dövlətçiliyimizə müxalif hesab edirəm. Cəmiyyətimiz də bunu görür. İqtidarın dialoq təklifinə müsbət yanaşan partiyaların rəhbərləri isə çox böyük hörmətlə qəbul edilir. Onların fikirlərini, problemlərini öyrənir və hər birinə çox həssaslıqla yanaşılır. Şəxsən debatlarda, tədbirlərdə partiya rəhbərlərilə görüşlərimizdə onlar da bundan razılıq edirlər. Bildirirlər ki, onlara fikirlərini ifadə etmək üçün limitsiz vaxt ayrılır. İstər partiya ilə bağlı, istərsə də, şəxsi problemləri ilə bağlı məsələlər qeydə alınaraq, ən qısa vaxtda həlli üçün müvafiq addımlar atılır. Bu da, təbii ki, ölkədə siyasi mühitin yaxılaşdırılması, sağlam siyasi rəqabət mühitinin formalaşması baxımından əhəmiyyətlidir. Atılan addımlar ölkədə siyasi plüralizmin inkişafına təkan verir və bu prosesin davam etdiriləcəyini düşünürəm.

-Sonda bir sual da təmsil etdiyiniz bölgənin problemlərilə bağlı vermək istərdim. Bildiyimiz kimi, Siz  Şəkini təmsil edirsiniz. Seçiciləriniz daha çox hansı problemləri qaldırırlar?

-Təbii ki, deputat kimi, əsasən, qanunvericilik fəaliyyəti ilə məşğul oluruq. Ancaq eyni zamanda təmsil etdiyimiz dairənin, şəhərin, seçicilərimizin probemlərini də daim diqqətdə saxlamağa çalışıram. Ayda minimum iki dəfə qəbul keçirirəm, Şəkidə əhalinin içərisində olur, problemlərini öyrənirik. Son bir ildə daha Şəhid ailələrini, qazilərimizi evlərində ziyarət edir, onlara diqqət göstərməyə çalışırıq. Seçicilərimin hər birinin problemlərinin həlli üçün bacardığımı edirəm. Eyni zamanda Şəki şəhəri ilə bağlı problemləri parlamentdə qaldırıb onların həllinə çalışırıq. Bu gün Şəkidə əsas problem su-kanalizasiya sisteminin yenidən qurulması istiqamətində işlərin yarımçıq qalmasıdır. Bu üzdən Şəkinin küçələrində, yollarında vəziyyət ürəkaçan deyil. Su-kanalizasiya sisteminin yenidən qurulması işləri başa çatdırılmalıdır ki, küçələr yenidən asfaltlansın, abadlaşdırılsın. İndiki vəziyyət Şəkinin turizm potensialına da mənfi təsir göstərir və şəhərin statusuna uyğun gəlmir. Bilirsiz, Şəki UNESKO-nun Dünya İrs Siyahısına daxil edilib, şəhər-qoruq kimi qorunur. Şəkinin bu siyahıya düşməsi üçün cənab Prezidentimiz, hörmətli Birinci vitse-prezidentimiz nə qədər böyük zəhmətlər çəkib. Ona görə də Şəkiyə daha ciddi diqqət göstərilməsi, şəhərin su-kanalizasiya sisteminin yenidən qurulması və yolların bərpası işlərinin ən qısa müddətdə başa çatdırılması lazımdır. Seçicilərimi ən çox narahat edən məsələ budur. Ümid edirəm ki, yeni ildən lazımi maliyyə vəsaiti ayrılaraq, bu məsələlər də həllini tapacaq. "AzPolitika.info"