AZ
RU
"Sərt tədbirlər xalqın nemətlərinə qarşı təcavüz edən məmurlara qarşı da tətbiq olunmalıdır"
"Beynəlxalq Bankdan külli miqdarda kredit götürüb qaytarmayanları təqib edərək bütün vasitələrlə bu krediti qaytarmağa məcbur edirlər. Dövlətin vəsaiti geri qaytarılmalıdır və cəmiyyətdə bu məsələdə fərqli düşüncə olduğunu sanmıram".
"Xeberinfo.com": Məlumata görə, bunu deputat Fazil Mustafa deyib. O, qeyd edib ki, ancaq Azərbaycan reallığında bir vacib faktor var ki, məmurların bizneslə məşğul olması yasaqlandığından, bir çox hallarda bu vəsaitlər onların tabeliyində olan işçilərin və ya qohumluq münasibətlərində olan insanların adına götürülür.
"Bu, əlbəttə, həmin şəxsləri məsuliyyətdən azad etmir, ancaq əsas məqsəd məhz dövləti talamaq məqsədi ilə bu prosesi həyata keçirən iri maliyyə resurslarını qanunsuz olaraq əlində cəmləyən insanların bu dələduzluq əməllərini dayandırmaq olmalıdır, məcburiyyətdən, günlük çörək qazanmaq səbəbindən adını bu məsələlərə qoşmuş insanları kampaniyaçılıq içində əsas günah keçisinə çevirmək doğru olmazdı. Deyək ki, bir oliqarx, sürücüsünün adına nəyisə sənədləşdirir, indi bu yazıq sürücü, razılıq verməsə, işdən çıxarılacaq, ailəsi sıxıntıya düşəcək. Ona görə də işin real mahiyyəti əsas götürülərək bu vəsaiti əsas sahibindən tələb etmək daha ədalətli olardı".
F.Mustafa qeyd edib ki, digər tərəfdən bu sərt tədbirlər xalqın nemətlərinə qarşı təcavüz edən məmurlara qarşı da tətbiq olunmalıdır. Məsələn, Xəzər dənizinə gedən yolları bağlayan, dəniz sahilini hasarlayıb insanları Allahın verdiyi bu nemətdən məhrum edən şəxslərə də oxşar yanaşma olmalıdır.
"Allah dənizi də verib ki, adam kimi hamınız istifadə edin, çimin, balığından yeyin, havasından, qumundan sağlamlıq üçün yararlanın. Bəzi məmurlar isə elə bilirlər ki, Xəzəri bankdan kredit götürüblər, istədikləri kimi xərcləyə bilərlər. Sahildə nə isə faydalı abadlıq və quruculuq işləri görsəydilər, yenə dərd yarıydı. Boş torpaqları hasarlayıb, yolları bağlayıb, çimərliklərə az qala tikanlı məftillərdən sərhəd qoyub, vətəndaşları sıxıntıya salırlar. Hələ də anlamaq istəmirlər ki, insaları Allahın nemətindən məhrum etməyə görə məşhər ayağına çəkilməklə müqayisədə, məhkəmə qarşısında müttəhim kimi durmaq toya getmək deməkdir".(ans press)
.jpg)
