Fövqəladə Hallar Nazirinin Kəmaləddin Heydərovun biznesində ciddi axsamalar yaranıb. O, Bosniyadakı 30 milyon avroluq şirə zavodunu heç cür başa gətirə bilmir.

Yenixeber.org: Bu barədə araşdırmaçı jurnalist Cavanşir Həsənli məlumat yayıb.
 

C.Həsənli bildirib ki, 2014-cü ildə təməli atılan və 2017-ci ildə istifadəyə verilməli olan zavodun tikintisi nəzərdə tutulan tarixdən daha iki il keçməsinə baxmayaraq, hələ də yekunlaşmayıb: 

“Heydərova məxsus "Benkons" şirkəti Bosniya hökumətindən və Doboj şəhər bələdiyyəsindən ən azı 300 nəfəri işlə təmin edəcək "Bosniya Jaləsi" üçün daha 2 il vaxt istəyib. Heydərovun layihəsinin gecikməsi Bosniya hökumətində də narahatlıqlar doğurub və izahat tələb olunub. Heydərovun şirkəti yubanmanın səbəbini "Azərbaycan iqtisadiyyatındakı geriləmələr və neftin qiymətinin düşməsi” ilə əlaqələndirib. Bunu Doboj bələdiyyə məclisinin rəhbəri Vojislav Raja da Bosniya mətbuatına açıqlamasında təsdiq edib. Hətta əlavə edib ki, şirkət texnika və maşınların idxalına görə ƏDV ödənilməsinin də iki il təxirə salınması üçün Bosniya hökumətinə müraciət edib, lakin rədd cavabı alıb”.