Yenixeber.org: Səudiyyə Ərəbistanında antikorrupsiya əməliyyatı çərçivəsində saxlanılan bəzi məmurların bank hesabları dondurulub. Prokurorluq isə əməliyyatların davamının olacağı barədə açıqlama verib. Bu zaman daha 500-ə yaxın məmurun həbsi gözlənilir.

Həftəsonu koorrupsiya komitəsi tərəfindən həbs edilən ərəb şahzadələr üçün "dünyanın ən lüks həbsxanası" hazırlanıb. İstiPress-in məlumatına görə, aralarında şahzadə, eks nazirlər və milyonçu iş adamlarının da olduğu dustaqlar üçün "Ritz-Carlton Riyad" oteli ayrılıb. Lüks otel milyardların sahibləri üçün "qızıl qəfəs"ə çevrilib. 

"Ritz-Carlton" dünyanın ən öndə gedən, unudulmaz təcrübələr yaşadan lüks otellər zənciri şüarı ilə məşhurdur. Adətən iri ölkələrin rəhbərləri və ya ərəb şeyxləri başqa ölkələrə səfərləri zamanı məhz bu otellərdə qalırlar.

ABŞ prezidenti Donald Trampı qəbul etməsindən bir neçə ay sonra otel həbsxanaya çevrilib.Məhbuslar otelin 2 min insan tutumu olan nəhəng dəvət salonda yerləşdiriliblər. Onlara yatmaq üçün nazik döşşək və adyallar verilib. Yeməkləri isə gündə bir neçə dəfə xüsusi qablaşdırmada hazır formada təqdim edilir. 

Şahzadələri ora gətirməmişdən öncə bütün müştəriləri çemodanları ilə birlikdə lojada toplayıblar. Daha sonra onlar paytaxtdakı fərqli otellərə yerləşdiriliblər. İndi 400-dən çox otağı olan otel ancaq şahzadələr üçün ayrılıb. Otelin azı 2 ay bağlı qalacağı ehtimal edilir. 

Xatırladaq ki, ötən gün otelin içindən görüntülər internetdə yayaılmışdı. Həmin görüntülərdə şahzadələr üzlərinin görünməməsi üçün hər yerlərini adyalla bağlamışdılar.