Onlarla hədəfə qabaqlayıcı zərbə endirilib: İran ordusu genişmiqyaslı cavab verməyə hazırlaşır

Yenixeber.org: Bu gecə İsrail İrana bir neçə hava zərbəsi endirib. Hücumun başladığını “Axios” portalı xəbər verib və bunu İsrailin müdafiə naziri İsrael Katz da təsdiqləyib. İsrailin İrana qabaqlayıcı zərbəsindən sonra yaxın gələcəkdə İsrailə və onun mülki əhalisinə raket və dron hücumu gözlənilir.

Bundan əvvəl “ABC News” xəbər vermişdi ki, İsrail hakimiyyəti yaxın günlərdə İrana zərbə endirə bilər. Üç KİV-in məlumatına görə, onlar Vaşinqtonun hücumun hazırlanmasında iştirak edib-etmədiyini bilmirlər.

O da məlum olub ki, İran hakimiyyəti onların tərəfdən hücum olacağı təqdirdə İsrailə cavab raket zərbəsi endirmək planı hazırlayıb. Ehtimal olunur ki, cavab tədbirləri yüzlərlə ballistik raketdən istifadəni əhatə edəcək.

Müdafiə naziri İsraildə fövqəladə vəziyyət elan edib, bütün ölkədə həyəcan siqnalı səslənib.

Bənzər bir xəbərdarlıq İsrail Daxili Qoşunların Komandanlığı tərəfindən də edilib. Ölkədə bütün təhsil tədbirləri və toplantılar qadağan edilib, əsas sektorlar istisna olmaqla, məktəb və iş ləğv edilib.

İsrailin Ben Qurion hava limanı hücum fonunda gecə uçuşları ləğv edib və İrandan cavab gözlənildiyi üçün uçuşlar hələlik olmayacaq.

İranın Mülki Aviasiya Təşkilatı vəziyyət aydınlaşana qədər Tehranın İmam Xomeyni hava limanın da fəaliyyətini dayandırıb.

İsrailin Baş naziri Benyamin Netanyahu İrana zərbələrin hədəfini açıqlayıb. O İsrailin "İranın nüvə zənginləşdirmə proqramının mərkəzinə" zərbə vurulduğunu bildirib.

“Biz İranın nüvə zənginləşdirmə proqramının ürəyini vurduq, İranın Natanzdakı əsas zənginləşdirmə obyektinə hücum etdik”, - Netanyahu qeyd edib.

Siyasətçi bildirib ki, hücum İranın raket obyektlərinə edilib. O əsas məqsədin İsrail üçün təhlükəni aradan qaldırmaq olduğunu vurğulayıb. Deyib ki, əməliyyat “lazım olduğu qədər” davam edəcək.

İsrail ordusunun sözçüsü isə əməliyyatın birinci mərhələsinin başa çatdığını bildirib. “The Times of Israel” hərbi rəsmilərə istinadən yazıb ki, əməliyyat bir neçə gün davam edə bilər.

Qısa müddətdə İsrail Hərbi Hava Qüvvələrinin onlarla təyyarəsi İranın müxtəlif bölgələrindəki nüvə obyektləri də daxil olmaqla, onlarla hərbi obyektə zərbələr endirən əməliyyatın birinci mərhələsini tamamlayıb.

“Reuters” İsrail hərbi rəsmisinə istinadən xəbər verir ki, İsrailin İrana endirdiyi zərbələrin hədəfində İran hərbi komandirləri və nüvə alimləri də olub.

Bildirilib ki, İsrailin zərbələri nəticəsində İran ordusunun Baş Qərargah rəisi Məhəmməd Baqiri həlak olub. Lakin bu məlumatın rəsmi təsdiqi yoxdur. Bundan əlavə, İranın “Tasnim” xəbər agentliyi hava zərbəsi nəticəsində İslam İnqilabı Keşikçiləri Korpusunun (SEPAH) komandiri, general Hüseyn Səlaminin həlak olduğunu təsdiqləyib.

İsrailin “Ynet” portalı yazır ki, İsrail minlərlə ehtiyatda olan əsgəri hərbi xidmətə çağırmağa başlayıb. Hərbi qüvvələr kritik birliklər üçün səfərbər edilir: Hərbi Hava Qüvvələri, Daxili Cəbhə Komandanlığı, Şimal və Mərkəzi Komandanlıqlar və hərbi kəşfiyyat.

Partlayış səsləri İranın bir sıra əyalətlərində, o cümlədən Kirmanşah və Luristan əyalətlərində eşidilib. Bu barədə İsrailin hava hücumları ilə bağlı xəbərlər fonunda “Tasnim” məlumat yayıb.

“Al Masirah” telekanalı İsrail hərbçilərini Tehranda yaşayış binalarına zərbələr endirməkdə ittiham edib. İran paytaxtında hava hücumundan müdafiə sistemlərinin səsləri və davam edən partlayış səsləri eşidilib. Yerli media şəhərin üzərində tüstünün qalxdığını əks etdirən görüntülər yayıb.

Hücum nəticəsində ölən və yaralananların olduğu, onların dəqiq sayının hazırda məlum olmadığı qeyd edilir.

“Israel Today” “Telegram” kanalı İranın uranın zənginləşdirilməsi obyektlərinin yerləşdiyi Natanza zərbənin görüntülərini dərc edib.

CNN Ağ Ev rəsmilərinə istinadən xəbər verir ki, İsrailin İrana bir neçə zərbə endirməsindən sonra ABŞ Prezidenti Donald Tramp Nazirlər Kabinetinin iclasını çağırmaq qərarına gəlib.

ABŞ dövlət katibi Marko Rubio bildirib ki, İrana zərbələr endirmək məsələsində Vaşinqtonun prioriteti regionda Amerika qüvvələrinin müdafiəsi olaraq qalır. O qeyd edib ki, İsrail Vaşinqtonu məlumatlandırıb ki, “bu əməliyyat özünümüdafiə üçün zəruridir”.

“Bizim İrana zərbələr endirməklə heç bir əlaqəmiz yoxdur və bizim ən böyük prioritetimiz bölgədəki qüvvələrimizi qorumaqdır”, Rubio deyib.

Dövlət Departamentinin rəhbəri bildirib ki, “ABŞ Prezidenti Donald Tramp və onun administrasiyası Amerika qüvvələrini qorumaq üçün bütün lazımi tədbirləri görüb”. O İranı ABŞ-ın maraqlarına toxunmamağa və Amerika personalına zərər verməməyə çağırıb.

“Axios” portalı daha əvvəl qeyd edib ki, ABŞ İsrailin hava hücumundan müdafiə sisteminin nüvə obyektlərinə mümkün hücuma cavab olaraq İranın raket zərbəsinə tab gətirməyəcəyindən narahatdır.

Nəşr yazıb ki, ABŞ Prezidenti Donald Trampın Yaxın Şərq üzrə xüsusi nümayəndəsi Stiv Vitkoff İranın nüvə obyektlərinə zərbələrə cavab verəcəyi təqdirdə İsrail tərəfinin mümkün kütləvi itkiləri barədə xəbərdarlıq edib. Portal həmçinin ABŞ kəşfiyyatının məlumatlarına istinad edir ki, İranda 900 kiloqram və ya daha çox yük daşıya bilən təxminən iki min raket var. İsrail onların əksəriyyətinin əhatə dairəsindədir.

İranın dini lideri, Ali Rəhbər Əli Xamenei İsrailin İslam Respublikasına hücumuna münasibət bildirərək deyib ki, yəhudi dövləti etdiyi əməllərə görə mütləq cəzasını alacaq. Onun bəyanatını IRNA xəbər agentliyi yayıb.

"Bu gün sübh çağı sionist rejim İsrail sevimli ölkəmizdə törətdiyi cinayətlə çirkli və qanlı əlini göstərdi və öz pis mahiyyətini hər zamankındən daha çox göstərdi... İslam Respublikasının silahlı qüvvələrinin qüdrətli əli, Allahın izni olsa, ona cavab verəcək", - Xamenei bildirib.

O müraciətində bir neçə komandir və alimin ölümünü də təsdiqləyib. Ali Rəhbər qeyd edib ki, yəhudi dövləti öz hərəkətləri ilə özü üçün “acı və ağrılı” tale hazırlayıb.(AYNA)