Hakimiyyət dincliyə çağırır, müxalifət yeni seçki tələb edir, Qərb isə... həmişə olduğu kimi qalibin yanındadır

Yenixeber.org: Mərkəzi Seçki Komissiyasının (MSK) açıqladığı məlumata görə, hakim “Gürcü Arzusu” partiyası 53,92 faiz səslə qalib gəlib. Parlament seçkilərinin nəticələri ilə razılaşmayan Gürcüstan seçiciləri Prezident Salome Zurabişvilinin çağırışına cavab veriblər və etiraz etmək üçün dünəndən küçələrə çıxıblar.

Seçki barajını aşan və seçkinin nəticələrini tanımayan müxalifət partiyalarının təşkil etdiyi etiraz aksiyası Tbilisinin mərkəzində, Rustaveli prospektində, parlamentin qarşısında baş tutub. Saat 22.00-də Avropa İttifaqı (Aİ) və Gürcüstanın himnlərinin oxunması ilə başlayan dünənki mitinq “Biz yenidən gələcəyik” vədi ilə yekunlaşıb.

Gürcüstan Prezidenti Salome Zurabişvili vətəndaşları mitinqdə iştirak etməyə çağırıb. Seçkilərin ertəsi günü, o, dörd müxalifət partiyasının (Fəaliyyət Xartiyasının iştirakçıları olan “Dəyişiklik Naminə Koalisiya”, “Birlik üçün Gürcüstanı xilas et”, “Güclü Gürcüstan” və Mərkəzi Seçki Komissiyasının məlumatına görə, səslərin 37,77 faizini toplayan keçmiş Baş nazir Qaxariyanın “Gürcüstan Naminə” partiyası) liderləri ilə görüşüb.

Bundan sonra axşam saatlarında Prezident xalqa müraciət edərək səsverməni “rus seçkisi” və “tamamilə saxta” adlandırıb. O, bazar ertəsi xalqı etiraza çağırıb və beynəlxalq ictimaiyyəti hakimiyyətin ələ keçirilməsinə reaksiya verməyə və “Gürcüstanın Avropa gələcəyi üçün öz xalqı ilə birlikdə mübarizə aparmağa” çağırıb.

İndi də Rustaveli prospekti yenidən etirazçılarla dolub, müxalifət partiyalarının liderləri mitinqdə çıxış edərək təkrar seçkilərin keçirilməsini tələb edirlər. Mitinqdə “Birlik-Milli Hərəkat” partiyasının liderlərindən olan Giorgi Vaşadze müxalifətin qərarlarını elan edib:

“Birincisi: həm siz, həm də biz bu seçkiləri qeyri-legitim hesab edirik;

İkincisi, biz bu parlamentə girmək fikrində deyilik, bütün mandatlardan imtina edirik, siyahıları ləğv edirik;

Üçüncüsü, qalib gələnə qədər mübarizə aparacağıq və qalib gələcəyimizə söz veririk;

Dördüncüsü, bizim çox konkret tələbimiz var: seçkilərin yenidən keçirilməsi. Lakin bu seçki beynəlxalq seçki administrasiyası tərəfindən keçirilməlidir”.

Eyni zamanda, Vaşadze bildirib ki, müxalifət “yenidən seçkilərin keçirilməsini” müzakirə etməkdən başqa, “Gürcü Arzusu” ilə heç bir danışıqlar aparmaq niyyətində deyil. Salome Zurabişvili də mitinqdə çıxış edərək nəticələrin oğurlandığını və “heç kimin onları tanımayacağını” bildirib.

“Sizə demək istəyirəm ki, siz burada olanlar seçkilərdə uduzmadınız. Sənin səsini oğurlayıb, sənin gələcəyini oğurlamağa çalışıblar, heç kimin buna haqqı yoxdur və sən heç kimə bunu etməyə icazə verməyəcəksən... And içirəm ki, bu Avropa yolunun sonuna qədər səninlə olacam. Biz təkcə bizim arzumuz deyil, reallıq, gələcək olan Avropanın qapılarına çatmalıyıq və bizim alternativimiz yoxdur və bu ölkəni gələcək nəsillərə müstəqillikdən, azadlıqdan, avropalılıqdan başqa heç nə buraxmaq istəmirik. Bizi izləyən və çox qiymətli olan gürcü kimliyini qorumalıyıq”, - deyə Zurabişvili vurğulayıb.

Qeyd edək ki, “Georgia Online” saytının verdiyi məlumata görə, dünən gün ərzində Prezident Avropa liderləri və Avropa institutlarının rəhbərliyi ilə fəal məsləhətləşmələr aparıb.

Təəssüf ki, Aİ və bir çox Avropa ölkələrinin rəhbərləri yalnız bütün pozuntu hallarının araşdırılmasının zəruriliyindən danışdılar. Bunu Böyük Britaniyanın Avropa və Şimali Amerika üzrə dövlət naziri Stiven Douti, Aİ-nin ali nümayəndəsi Cozef Borrel və Avropa Komissiyası birgə bəyanatla çıxış edərək deyib.

Onlar hamısı ATƏT-in Beynəlxalq Müşahidəçilər Missiyasının seçkilərin yüksək səviyyədə təşkil olunduğunu, lakin qanun pozuntuları, o cümlədən seçicilərə təzyiqlər və səsvermənin məxfiliyinin qorunmasında nöqsanlarla yadda qaldığını bildirən rəyi ilə razılaşdılar.

Avropalı nümayəndələr həmçinin Gürcüstanda bütün siyasi qüvvələr arasında dialoqun vacibliyini vurğulayır və ölkəni Aİ prinsiplərinə uyğun demokratik islahatlar aparmağa çağırırlar. Avropa Parlamentinin üç üzvü - Avropa Parlamentinin Beynəlxalq Əlaqələr Komitəsinin sədri Devid Makallister, Cənubi Qafqaz ölkələri ilə əlaqələr üzrə nümayəndə heyətinin rəhbəri Nils Uşakov və Avronest Parlament Assambleyasında nümayəndə heyətinin rəhbəri Sergey Laqodinski birgə bəyanatla çıxış ediblər. Onlar seçkidən sonrakı dövrün dinc, demokratik keçəcəyinə ümid etdiklərini bildiriblər və Gürcüstanın Aİ yoluna qayıtması üçün təcili addımlar atılacağına ümidlərini ifadə ediblər.

Hətta Prezident Salome Zurabişvilinin bəyanatlarına cavab verən ABŞ Helsinki Komissiyası da öz şərhində qətiyyətli olmayıb və bu işi Dövlət Departamentinə həvalə edib: “Əgər ABŞ Dövlət Departamenti bu seçkilərin həqiqətən saxta olduğunu və gürcü xalqının iradəsini əks etdirmədiyini təsdiq edərsə, o zaman bu məsələ ilə bağlı aydın bəyanat verməlidir”.

Yaxşı, bəs Dövlət Departamenti? ABŞ dövlət katibi Entoni Blinken “seçkilərin nəticələrini azad və ədalətli kimi tanımayan” beynəlxalq müşahidəçilərə istinad edib. O, sadəcə olaraq pozuntuları pisləyib və beynəlxalq və yerli müşahidəçilərin “seçkilərlə bağlı pozuntular haqqında bütün hesabatların tam yoxlanılması” çağırışlarını dəstəkləyərək, beynəlxalq standartlara riayət etməyə çağırıb.

Blinken öz bəyanatında Gürcüstanın siyasi liderlərini “qanunun aliliyinə hörmətlə yanaşmağa, əsas azadlıqlara xələl gətirən qanunvericiliyi ləğv etməyə və seçki prosesindəki qüsurları aradan qaldırmaq üçün birgə işləməyə” çağırıb. Bu bəyanat kimə ünvanlanmışdı? Hakimiyyəti saxlasa - "Gürcü arzusu"na, yıxılsa - yeni hökumətə...

Hansı faktorlar imkan verdi ki, hakimiyyətdə olan partiya avropalıların seçkiləri tanıdığını və keçmiş seçkilərin legitim olduğunu bəyan etsin? Belə ki, “Gürcü Arzusu”nun icraçı katibi Mamuka Mdinaradze bildirib ki, beynəlxalq müşahidəçilərin ilkin qiymətləndirmələrini oktyabrın 26-da Gürcüstanda keçirilən parlament seçkilərinin “kritik etirafı” adlandırmaq olar. Onun sözlərinə görə, “Gürcü Arzusu” tənqidlərlə bağlı monitorinq missiyaları ilə razı deyil, amma seçkilərin tanınması faktı ilə razılaşır. Hakim partiyanın icraçı katibi vurğulayıb ki, heç kim seçkiləri qeyri-legitim kimi tanımayıb.

Yeri gəlmişkən, dünən Baş nazir İrakli Kobaxidze Aİ ilə danışıqlara qayıtdığını və yeni ilin əvvəlində münasibətlərin bərpa olunacağını söyləyib. O vurğulayıb ki, əvvəllər Bidzina İvanişvilinin bəyan etdiyi kimi, ölkə 2030-cu ilə qədər Avropa İttifaqına tam inteqrasiya edəcək.

Amma bu da bir həqiqətdir ki, “batan insanları xilas etmək boğulanların öz işidir”. Gürcüstan əhalisi seçkinin nəticələri ilə razılaşmırsa, öz səsini müdafiə etməlidir. Qərb isə həmişə qalibin yanındadır...(Ayna)