Çin ümumdaxili məhsulun həcminə görə 2032-ci ildə ABŞ-ı üstələyəcək

Yenixeber.org: Bu barədə informasiya Britaniyanın İqtisadiyyat və Biznes Problemləri Tədqiqatları Mərkəzinin (CEBR) hesabatında yer alıb. Mərkəz 2032-ci ildə iqtisadiyyatın böyüklüyünə görə ilk dördlüyü Hindistan və Yaponiyanın tamamlayacağını bildirib. İlk onluğa isə Almaniya, Braziliya, Britaniya, Cənubi Koreya, Fransa və İndoneziyanın düşəcəyi vurğulanıb.

Hesabatda ən maraqlı artımın Hindistanla bağlı yaşanacağı bildirilib. Belə ki, Hindistan 2018-ci ildə iqtisadiyyatın həcminə görə Britaniya və Fransanı qabaqlayacaq. 2027-ci ilə qədər isə bu ölkə Almaniyanı da qabaqlayıb, ilk üçlüyə düşəcək.

CEBR-in hesabatına əsasən, gələn il iqtisadiyyatın həcminə görə ilk onluqda ABŞ, Çin, Yaponiya, Almaniya, Hindistan, Fransa, Britaniya, Braziliya, İtaliya və Kanada yer alacaq. 2027-ci ildə isə bu siyahıdan İtaliya çıxacaq və yerinə Cənubi Koreya daxil olacaq.

Rusiyaya gəlincə, neft qiymətlərinin ucuz olması səbəbindən böyük itkilərə məruz qalacaq. 2032-ci ildə bu ölkə 11-ci yerdən 17-ci yerə qədər geriləyəcək.