Azərbaycan Respublikasının Prezidenti cənab İlham Əliyevin respublikada pambıqçılığın və baramaçılığın inkişafına dair tapşırıqları, bununla bağlı Prezident Administrasiyasında keçirilmiş müşavirələrdə verilmiş tövsiyələrin yerlərdə icra vəziyyətinin öyrənilməsi ilə əlaqədar  Horadiz şəhərində Heydər Əliyev Mərkəzində müşavirə keçirildi.

Xeberinfo.com:  Müşavirədə Füzuli rayon İcra Hakimiyyəti başçısı Alı Alıyev, Azərbaycan Respublikası Prezidenti Administrasiyasının Aqraq məsələlər şöbəsinin müdiri Azər Əmiraslanov, Azərbaycan Respublikası Prezidenti Administrasiyasının Regional İdarəetmə və yerliözünüidarəetmə orqanları ilə iş şöbəsinin məsul əməkdaşı Əflatun Rufiyev, Kənd təsərrüfatı nazirinin müavini SeyfəddinTalıbov, İqtisadiyyat nazirinin müavini Sahib Məmmədov, Fövqəladə hallar nazirinin müavini Tapdıq Əmiraslanov, Meliorasiya və Su Təsərrüfatı ASC-nin sədr müavini Zakir Quliyev, “MKT İstehsalat Kommersiya” MMC sədri Bəhruz Camalov, rayonun aidiyyəti idarə və təşkilatları, fermerlər, torpaq istifadəçiləri iştirak etdi.

        Azərbaycan Respublikası Prezidenti Administrasiyasının aqrar siyasət məsələləri şöbəsinin müdiri Azər Əmiraslanov çıxış edərək, Prezident cənab İlham Əliyevin rəhbərliyi ilə ölkəmizdə aparılan islahatlardan, qeyri-neft sektorunun, o cümlədən kənd təsərrüfatının inkişafı sahəsində görülən tədbirlərdən danışdı. Bildirdi ki, ölkə başçısı yerlərdə kənd təsərrüfatının inkişafı, yerli istehsalın artırılması, əhalinin məşğulluğunun yüksəldilməsi ilə bağlı tapşırıqlarından biri də bölgələrdə pambıqçılığın və baramaçılığın inkişaf etdirilməsidir.

Azər Əmiraslanov qeyd edib ki, yeni iqtisadi mərhələdə kənd təsərrüfatı məhsullarının istehsalının artırılması, xüsusilə, ixrac tutumlu sahələrin, o cümlədən pambıqçılığın inkişafı əsas yer tutur. Çünki pambıqçılıq həm gəlirli sahədir, həm də yeni iş yerlərinin açılması deməkdir. Baramaçılıq da belə sahələrdəndir.

Füzuli rayon İcra Hakimiyyəti başçısı Alı Alıyev rayonda pambıq əkininin gedişi, rayonda bu sahədəki vəziyyət barədə məlumat verdi. Alı Alıyev qeyd etdi ki, münbit torpaqlar və suvarma suyu ilə təminat onu deməyə əsas verir ki, Füzuli rayonunda bu sahələri inkişaf etdirmək olar.  Bildirdi ki, bu il rayonda 500 ha sahədə pambıq əkilməsi üçün yer müəyyənləşdirilib və şum aparılıb. Hazırda bu istiqamətdə işlər davam etdirilir.

Müşavirədə aşağıdakı təkliflər irəli sürüldü: Torpağın yemləmə rasionunu düzgün müəyyənləşdirmək üçün qabaqcadan torpaqların analizi aparılması, Bitkilərin təlabatına uyğun suvarılma aparılması, üzvü gübrələrin yerlərdə hazırlanmasına diqqət yetirilməsi, pambıq əkininə görə istehsalçılara subsidiyalar verilsməsi, ərazilərin işğal olunması və baramaçılığın diqqətdən kənarda qalması nəticəsində  rayonda əvvəllər mövcud olmuş tut bağları 20 ildən çoxdur ki, ləğv edilmişdir. Ona görə də yeni tut bağları salınması və ilk illərdə tut yarpaqlarının alınması üçün istehsalçılara subsidiyalar verilsin.

Diskussiya şəraitində keçən müşavirədə pambıq emalı müəssisələrinin rəhbərləri, fermerlər çıxış edərək, pambıq əkini sahəsində görülmüş işlərdən danışıb, pambıqçılığın inkişafı, mövcud problemlərin aradan qaldırılması yollarından bəhs ediblər.

Müşavirə iştirakçıları rayonda pambıq və barama istehsalının artırılmasını dəstəklədiklərini bildiriblər.