İranda keçirilmiş karate üzrə beynəlxalq yarışda Azərbaycan bayrağının Ermənistan bayrağının altından asılmasına etiraz etməyim Vətənə və bayrağımıza olan sevgimdən irəli gəlib.

Yenixeber.org: Bunu  Bakı Şəhəri üzrə Təhsil İdarəsinin tabeliyindəki 95 nömrəli tam orta məktəbin V sinif şagirdi, İranda keçirilmiş karate üzrə beynəlxalq yarışda bayrağımızın Ermənistanın bayrağı altından asılmasına etiraz edən Zəhra Salmanlı deyib.

Onun sözlərinə görə, Azərbaycan bayrağının Ermənistan bayrağının altından asılmasını görən kimi bu barədə ilk olaraq, onunla birgə həmin ölkəyə səfər edən nənəsinə məlumat verib. Daha sonra isə komanda üzvləri ilə birlikdə yarış təşkilatçılarına müraciət ediblər:

“Bayrağın belə asıldığını ilk olaraq, mən gördüm. Daha sonra komanda yoldaşlarım Ulvira və Elnaz da mənə dəstək oldular. Birlikdə təşkilatçılara yaxınlaşaraq bildirdik ki, əgər bayrağın yeri dəyişdirilməsə, biz yarışda iştirakdan imtina edəcəyik. Təşkilatçılar bizim bu sözlərimizə hörmətlə yanaşdılar və bunun səhvən bu şəkildə asıldığını, səhvin aradan qaldırılacağını söylədilər”.

Z.Salmanlının atası Mirhəbib Salmanlı qeyd edib ki, övladının bu hərəkəti fərəhləndiricidir və onun üçün qeyri-adi hal deyil:

“Mən hesab edirəm ki, Vətəni sevən hər bir azərbaycanlı belə vəzyyətlə qarşılaşsaydı, bu cür hərəkət edərdi. Ona görə də Zəhranın bu etirazını normal qarşılayram. 10 yaşlı Zəhranın bayrağımıza qarşı belə diqqət göstərməsi onu göstərir ki, bizim övladlarımız, Azərbaycan uşaqları Vətənə sevgi ilə böyüyürlər. Biz bununla fəxr edirik”.

Xatırladaq ki, Bakı Şəhəri üzrə Təhsil İdarəsinin tabeliyindəki 95 nömrəli tam orta məktəbin V sinif şagirdi Z.Salmanlı İranda keçirilmiş karate üzrə beynəlxalq yarışda Azərbaycan bayrağının Ermənistan bayrağının altından asılmasına etiraz edib. Azərbaycan bayrağının yeri dəyişdirilməyəcəyi təqdirdə yarışa qatılmayacağını bildirib. Nəticədə bayraq fərqli və daha uyğun yerdə asılıb.

Erməni rəqibini isə mütləq üstünlüklə məğlub edən Z.Salmanlı turnirdə bütün rəqiblərinə qalib gələrək qızıl medala layiq görülüb.