Türkiyə NATO strukturlarında çalışmış və 15 iyul hərb çevriliş cəhdindən sonra sığınacaq üçün Almaniyaya müraciət etmiş 40 hərbçinin təhvil verilməsini tələb edib.

Xeberinfo.com:   Türkiyənin müdafiə naziri Fikri İşıq deyib ki, Almaniyanın Fətullahçı Terror Təşkilatının (FETÖ) üzvü olmaqda şübhəli sayılan 40 hərbiçini Türkiyəyə təhvil verməsi lazımdır.

F. İşıq bildirib ki, Almaniya məhkəməsi və rəsmiləri məsələni diqqətlə dəyərləndirməli və həmin şəxslərin sığınacaq müraciətlərinə mənfi cavab verməlidir.  Türkiyə müdafiə naziri bu məsələni fevralın 15-də NATO müdafiə nazirlərinin toplantısında və daha sonra Münhen Təhlükəsizlik Konfransında almaniyalı həmkarı ilə müzakirə edəcəyini nəzərə çatdırıb: “Türkiyədə hərbi çevrilişə cəhd etmiş bir strukturun üzvü olduğu iddia edilən şəxslərin Almaniya tərəfindən himayə edilməsi Türkiyə ilə mədəni, sosial, siyasi əlaqələri çox güclü olan bir ölkə üçün qəbuledilməzdir. Bunun çox ciddi nəticələri ola bilər. Dünya terrorla mübarizədə Türkiyə ilə əməkdaşlığı gücləndirməlidir. Türkiyə terrorla səmimi və çox ciddi mübarizə aparır və yalnız qoyulmamalıdır. Bu gün Türkiyə yalnız buraxılsa, sabah yanlarında olacaq ölkə tapa bilməzlər. Almaniyadan gözləntimiz sığınacaqla bağlı müraciətləri rədd etməsi və Almaniyadakı FETÖ mənsublarının Türkiyəyə təhvil verilməsidir”