“Təkamül” Tərcümə Mərkəzinin rəhbəri Ceyhun Cəfərov MTN əməkdaşları tərəfindən saxlanılıb, onun dövlət çevrilişində suçlandığı deyilir

İlahiyyatçı, “Təkamül” Tərcümə Mərkəzinin direktoru Ceyhun Cəfərov MTN əməkdaşları tərəfindən həbs olunub. Bu barədə “Yeni Müsavat”a ilahiyyatçının yaxınları məlumat verib. Hazırda MTN-də saxlanılan ilahiyyatçı ilə bağlı yaxınlarına heç bir məlumat verilmir.

İlahiyyatçının qardaşı Əlipaşa Cəfərov “Yeni Müsavat”a açıqlamasında bildirib ki, qardaşı ilə birlikdə bir neçə gün İranda müalicədə olub. Azərbaycana ötən həftənin 4-cü günü gəliblər və bu zaman MTN-dən zəng edərək C.Cəfərovu nazirliyə dəvət ediblər: “Mənim böyrəklərim tutulmuşdu. Müalicə məqsədi ilə İranın Urmiya şəhərinə getmişdik. Orda əməliyyat olundum, İranda 8 gün qaldıq. Ötən həftənin 4-cü günü qayıtdıq Azərbaycana. Hələ Bakıya çatmamışdıq, yolda Ceyhunun telefonuna zəng gəldi. Həftənin 2-cü günü saat 10-da MTN-ə dəvət etdilər”.

Ə.Cəfərov deyir ki, qardaşı dünəndən MTN-ə ifadə vermək üçün getsə də hələ də ondan bir xəbər ala bilmirlər. Əvvəlcə onlara MTN Yasamal İdarəsinə müraciət etmək məsləhət görülsə də, ordan geri qaytarılıblar: “Dünəndən 6-7 dəfə MTN-ə getmişik, heç bir məlumat verilmir. Yasamala rayon idarəsinə getdik, orda dedilər ki, bizdə adam saxlamaq mümkün deyil. Yenidən nazirliyə gəldik, axırda bizə bir nömrə verdilər, dedilər ki, vəkildir. Əyyub adlı vəkil bizə bildirdi ki, Ceyhuna qarşı dövlət çevrilişi ittihamı irəli sürülür, amma qəbul etmir. Ola bilsin sabah məhkəməyə çıxarılsın. Biz də indi narahat olmuşuq, axı bu ittiham hardan çıxdı, o, necə dövlətə qarşı çıxış edə bilərdi?”

Qardaşı bildirdi ki, Qafqaz Müsəlmanları İdarəsinə müraciət edərək Şeyxülislamla görüşməyə cəhd edəcəklər. Qeyd edək ki, ilahiyyatçı Ceyhun Cəfərov İslam Universitetində dərs deyib, “Space” telekanalında “Gecə söhbətləri” dini verilişində aparıcı olub. Eyni zamanda “Təkamül” Tərcümə Mərkəzinin direktoru olub, onlarla kitabın tərcüməçiliyini, redaktorluğunu edib. Bu nəşriyyat tərəfindən İslam dinində ən mükəmməl Quran təfsirlərindən olan “əl-Mizan” təfsiri tərcümə olunaraq nəşr olunub. Eyni zamanda C.Cəfərov Həcc ziyarəti zamanı QMİ tərəfindən zəvvar qruplarına rəhbərlik edib, ziyarətin təşkili və düzgün yerinə yetirilməsində zəvvarlara yardım edib.