AZ
RU
ABŞ-da Xədicə İsmayıla görə aksiya keçirilib
Dekabrın 8-i Vaşinqtonda, Azərbaycanın ABŞ-dakı səfirliyi qarşısında jurnalist Xədicə İsmayılın azad edilməsi tələbi ilə aksiya keçirilib. Təşkilatçı, amerikalı fotojurnalist Amanda Rivkin məqsədlərinin Azərbaycan hökumətindən Xədicə İsmayılın dərhal azadlığa buraxılmasını tələb etmək olduğunu deyib.
"Xeberinfo.com": “Amerikanın səsi” xəbər verir ki, səfirliyin qarşısına toplaşan amerikalılara və azərbaycanlılara Xədicə İsmayılın posteri paylanıb və onun gördüyü işlər barədə qısa fikir mübadiləsi aparılıb. Jurnalistlərin Beynəlxalq Mərkəzindən Patrik Batler “Azadlıq” radiosunun əməkdaşı Xədicə İsmayılın bütün dünya üçün yüksək keyfiyyətlərə malik jurnalist olduğunu deyib: “Xədicə bizimlə Mütəşəkkil Cinayət və Korrupsiya Xəbərçiliyi layihəsində çalışırdı. Biz onun özünü və işini dəstəkləyirik, eləcə də Əliyev hökumətini onu azad etməyə çağırırıq. Çünki onun saxlanmasını ədalətsiz həbs hesab edirik”.
Əllərində “Mətbuat azadlığına hörmət edin!”, “Jurnalistləri təhqir etməyin!” şüarları yazılmış plakatlar qaldıran iştirakçılar daha sonra Azərbaycan hökumətini Xədicə İsmayılı azad etməyə çağıran posterlərə imza ataraq dəstəklərini ifadə ediblər. Aksiyanın sonunda dəstək posterləri Azərbaycan səfirliyinə təqdim edilib.
Dekabrın 5-də həbs olunan Xədicə İsmayıl jurnalist Tural Mustafayevi özünü öldürməyə cəhd həddinə çatdırmaqda ittiham olunur.
