"Xeberinfo.com":   Məlumata görə, Saakaşvilinin iddiasına görə, Putinin planına əsasən tezliklə rus ordusu Azərbaycana da girəcək. Qeyd edək ki, bu Gürcüstanın eks–prezidenti Mixail Saakaşvilinin regionun gündəmini silkələyən növbəti bəyanatı deyil.

Təəccüblüsü ondadır ki, qonşu ölkənin “narıncı inqilablı” eks rəhbəri nə birinci, nə də ikinci dəfədir ki, bu cür çağırışlarla gündəmə gəlir. Bu onun 4 aydan bir səsləndirdiyi artıq 3–cü bəyanatıdır.

Məsələyə münasibət bildirən Azərbaycan Sosial Demokratlar Partiyasının sədri Araz Əlizadə Hafta.az-a açıqlamasında Saakaşvilinin dəli olduğunu deyib:

“Saakaşvili başdanxarabın biridir. Ağlı olsaydı öz dövlətinə, öz xalqına xidmət edərdi. O, Amerikaya xidmət göstərən bir adamdır. O, ilk olaraq gəlib xalqının qarşısında elədikləri üçün cavab versin. Sonra vaxt tapsa Azərbaycan haqqında danışar. Belələrinə siyasi provokator deyirlər”.

Araz Əlizadə qeyd edib ki, Rusiyanın Saakaşvilinin dediyi şəkildə bir planı olmağına inanmır:

“Rusiyanın Azərbaycana hücum etmək planı yoxdur. Bu cür bəyanat verməyə çalışanlar Rusiya ilə Azərbaycan arasında nifaq salmağa çalışırlar. Bu cür açıqlamalar verənlər isə bizim dostlarımız ola bilməz. Bunu Amerikanın casusları edir. Bunu Saakaşvili öz yanından demir. Onun ağzına salıb danışdıran var. O, deyəcəyi sözlərin hamısını amerikanlardan alır”.