Yenixeber.org: Sosial şəbəkələrdə Mingəçevir şəhərinin Nəriman Nərimanov küçəsində yerləşən yaşayış binalarına aid bir sıra fotolar yayılıb.

Fotolarda aydın görünür ki, həmin binaların küçəyə baxan fasad hissəsi sökülərək, mənzilin yerində qeyri-yaşayış sahəsi – yəni obyekt yaradılıb.

Ən maraqlı məqam isə odur ki, bu dəyişiklik şəhər İcra Hakimiyyətinin cəmi bir neçə metrliyində baş verib. Lakin Mingəçevir Şəhər İcra Hakimiyyətinin Memarlıq və Tikinti şöbəsinin müdiri, baş memar Etibar Abdullayevin bu proseslərdən xəbərsiz olduğu bildirilir. Sual yaranır: baş memar həqiqətənmi bu hadisədən xəbərsizdir, yoxsa məlumatlı olsa da, hansısa səbəbdən susur?

Yaşayış binasında bu cür ciddi dəyişikliklər hansı əsasla aparılıb?  İcra Hakimiyyətinin bir neçə addımlığında baş verən bu prosesə niyə nəzarət olunmayıb?  Baş memarın susqunluğunun səbəbi nədir?

Bütün bu suallar cavabını gözləyir.

Qeyd edək ki, Mingəçevirin hazırkı icra başçısı cənab İlham İsmayılovun şəhərdəki fəaliyyəti çərçivəsində bir çox müsbət dəyişikliklər baş verib. Lakin şəhərin mərkəzində, özü də İcra Hakimiyyətinin göz qabağında bu cür qanunsuzluqların baş verməsi görülən işlərə kölgə salır.

Şəhər əhalisi arasında yayılan söz-söhbətlərdə təəccüblə bildirilir ki, necə ola bilər ki, icra başçısının xəbəri olmadan bu cür qanunsuz dəyişikliklər həyata keçirilir? Bu kimi fikirlər bir daha göstərir ki, vətəndaşlar şəffaf və ciddi nəzarət mexanizmlərinin tətbiqinə ehtiyac duyurlar.

Məsələni diqqətdə saxlayır, adıçəkilən şəxslərin fəaliyyəti ilə bağlı daha geniş araşdırma aparacağımızı bildiririk./aranmedia

Araşdırmamız davam edir…(xalq.online)