Bu gün bələdiyyə seçkilərində səsvermə 19-da başa çatıb. Seçkilər 118 seçki dairəsinin 5 min 15 seçki məntəqəsində 1607 bələdiyyə üzrə keçirilib.

"Xeberinfo.com": Səhər saat 8-də başlayan bələdiyyə seçkilərində 15 min 35 yerə 37 min 77 namizəd iddia edib.

Məntəqələr saat 19-da bağlanıb.

“Media forum” saytı bildirir ki, Seçki Məcəlləsinə görə, səsvermə günündən ən geci 2 gün keçənədək dairə seçki komissiyası çoxmandatlı seçki dairəsi üzrə seçkilərin yekunlarını müəyyən edir.

Seçkilərdə iştirak edən və seçicilərin ən çox səsini toplayan namizədlər bələdiyyə üzvlərinin sayına bərabər olaraq müvafiq bələdiyyəyə üzv seçilmiş hesab edilirlər.

Mərkəzi Seçki Komissiyası səsvermə günündən başlayaraq ən geci 20 gün müddətində dairə seçki komissiyalarının protokollarını yoxlayır və seçkilərin ümumi yekunları haqqında protokol tərtib edir.

Seçkilər günündən başlayaraq ən geci 25 gün müddətində Azərbaycan Respublikası üzrə bələdiyyə seçkilərinin yekunları elan olunmalıdır. Mərkəzi Seçki Komissiyasının bu qərarı qətidir.